«قازگيدرومەت» رمك بولجاۋىنشا، الماتى قالاسىندا 23 قاراشا، سونىمەن قاتار، 29-30 قاراشا ارالىعىندا اۋا-رايى بۇزىلادى: جەل كۇشەيىپ، جاۋىن-شاشىن ءتۇسىپ، قار جاۋادى، اۋا تەمپەراتۋراسى -3 گرادۋسقا دەيىن تومەندەيدى. جولدار مەن تروتۋارلاردا كوكتايعاق بولادى، دەپ حابارلايدى almaty-akshamy.kz الماتى قالاسى كوممۋنالدىق ينفراقۇرىلىمدى دامىتۋ باسقارماسىنا سىلتەمە جاساپ.
جولعا مۇز قاتۋى مۇمكىن، جۇرگىزۋشىلەردى وتە مۇقيات بولۋعا، اراقاشىقتىقتى، بۇيىرلىك ارالىقتى ساقتاۋعا، قولايسىز اۋا-رايىن ەسكەرىپ، جىلدامدىقتى اسىرماۋعا، شۇعىل بۇرىلماۋعا جانە تەجەگىشتى بىردەن باسپاۋعا، جول بەلگىلەرىن قاتاڭ ساقتاۋعا شاقىرامىز. جاياۋ جۇرگىنشىلەر جولدا ابايلاپ ءجۇرىپ، مۇمكىندىگىنشە ساق بولۋى كەرەك، جۇرگىزۋشى ءسىزدى كورىپ، وتكىزىپ جىبەرگەنىنە كوز جەتكىزىپ، كولىك قۇرالى جاۋىن-شاشىن كەزىندە، اسىرەسە كوكتايعاقتا بىردەن توقتاي المايتىنىن ەستە ساقتاۋ قاجەت.
اۋدان اكىمدىكتەرىندە جاعدايدى باقىلاۋ بويىنشا تاۋلىك بويى كەزەكشىلىك ۇيىمداستىرىلادى. سۋدىڭ ارىق ارقىلى كەدەرگىسىز اعىپ كەتۋىن قامتاماسىز ەتۋ ءۇشىن 22 قاراشا كۇنى تاڭەرتەڭ اۋدان اكىمدىكتەرى 42 بريگادانىڭ كۇشىمەن ارىق جەلىلەرى مەن وتكەلدەردى تازارتۋ جۇمىستارىن ۇيىمداستىردى. جاۋىن-شاشىن باستالعاننان باستاپ ىقتيمال سۋ باسۋدىڭ الدىن الۋ ءۇشىن 37 كەزەكشى بريگادا، 168 بىرلىك ارنايى تەحنيكا، 23 موتوپومپا جانە 524 جۇمىسشى جۇمىلدىرىلادى. 1900 قاپ قۇم جينالادى.
الماتى قالاسىنىڭ كوممۋنالدىق ينفراقۇرىلىمدى دامىتۋ باسقارماسى كوكتايعاققا قارسى جۇمىسقا 10 مەردىگەر ۇيىم، 818 بىرلىك تەحنيكا مەن 1240 جۇمىسشى جۇمىلدىرادى. كوممۋنالدىق قىزمەتتەردىڭ كوكتايعاققا قارسى جەدەل جانە ساپالى جۇمىس جۇرگىزۋى ءۇشىن كولىك يەلەرىنەن مۇمكىندىگىنشە قالادا قوزعالىستى شەكتەي تۇرىپ، كولىكتەرىن جولدىڭ جيەگىنە قالدىرماۋىن سۇرايدى.