قۇقىق بۇزۋشىلىقتى رايىمبەك باتىر بەكەتىندە قىزمەت ەتەتىن پوليسيا قىزمەتكەرى انىقتادى،دەپ حابارلايدى Almaty-akshamy.kz
«بۇل دەرەك 13 ساعات 45 مينۋتتا رەنتگەن-تەليەۆيزور قوندىرعىسى ارقىلى جۇرگىزىلگەن تەكسەرۋ كەزىندە انىقتالدى. ىلە اۋدانىنىڭ 17 جاسار تۇرعىنى ۇستالدى ونىڭ سومكەسىن تەكسەرۋ كەزىندە كاستەت تابىلدى. جاس جىگىت ءوزىن اقتاپ الۋعا اسىعىپ، سومكەسىن دوسىنا تيەسىلى ەكەنىن ءتۇسىندىردى. قۇقىق بۇزۋشى اۋماعىنا قاراي جەتىسۋ اۋداندىق پوليسيا باسقارماسىنىڭ قىزمەتكەرلەرىنە تاپسىرىلدى. ونىڭ ارەكەتىنە قازاقستان رەسپۋبليكاسىنىڭ زاڭناماسىنا سايكەس شارا قولدانىلىپ، قۇقىقتىق باعا بەرىلەتىن بولادى»، – دەدى مەتروپوليتەن پوليسيا باسقارماسىنىڭ باستىعى نۇرلان امانبەك.
ەستەرىڭىزگە سالا كەتەيىك، قۇقىق بۇزۋشىلىققا مۇلدەم توزبەۋشىلىك قاعيداتىن نىعايتۋ، كوشەلەردە جانە باسقا دا قوعامدىق ورىنداردا ءتيىستى قوعامدىق ءتارتىپتى ساقتاۋ ماقساتىندا وسى جىلدىڭ 20-30 قاراشاسى ارالىعىندا قالادا “قۇقىقتىق ءتارتىپ” جالپىرەسپۋبليكالىق جەدەل الدىن الۋ ءىس-شاراسى وتكىزىلىپ جاتىر. ول ۆانداليزم دەرەكتەرىن، مۇلىكتىك زالال كەلتىرۋدى، ۇساق بۇزاقىلىقتى، جول قوزعالىسى قاۋىپسىزدىگى سالاسىنداعى بۇزۋشىلىقتاردى انىقتاۋ جانە جولىن كەسۋگە، سونداي-اق تۇرمىستىق زورلىق-زومبىلىق، ونىڭ ىشىندە كامەلەتكە تولماعاندارعا قاتىستى قۇقىق بۇزۋشىلىقتاردىڭ الدىن الۋعا باعىتتالعان.