سەمينار قازاقستان رەسپۋبليكاسى ىشكى ىستەر مينيسترلىگىنىڭ باستاماسىمەن، عىلىم جانە جوعارى ءبىلىم مينيسترلىگىنىڭ قولداۋىمەن ۇيىمداستىرىلدى.
قازاقستاندا ۇقك، تج، پوليسيا، پروكۋراتۋرا ماماندارىن جانە اسكەري قىزمەتكەرلەر دايارلايتىن 13 اسكەري جانە ارنايى وقۋ ورىندارى بار. ءىىم م.ەسبولاتوۆ اتىنداعى ق ر ءىىم الماتى اكادەمياسىندا وتكەن وسى اسكەري جانە ارناۋلى وقۋ ورىندارىنىڭ ءبىرىنشى باسشىلارىنا ارنالعان سەمينار-كەڭەستىڭ تاقىرىبى – “قۇقىق قورعاۋ جانە كۇشتىك قۇرىلىمداردىڭ كاسىبي كادرلارىن دايارلاۋ جونىندەگى ءبىلىم بەرۋدىڭ جاڭا تاسىلدەرىن يگەرۋ” بولدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ءىس-شارانى اشقان اكادەميا باستىعى ايدار سايتبەكوۆ اتالعان وقۋ ورنىندا پرەزيدەنتتىڭ جوعارى ءبىلىم بەرۋ ساپاسىن ارتتىرۋ جونىندەگى تاپسىرماسىن ورىنداۋ ماقساتىندا ءىس-شارالار كەشەنى جۇزەگە اسىرىلىپ جاتقانىن، ال ارنايى وقۋ ورىندارى باسشىلارىنىڭ اشىق ديالوگى جاڭا قازاقستانداعى ءبىلىم بەرۋ جۇيەسىن جەتىلدىرۋدىڭ ەڭ وزەكتى ماسەلەلەرىن شەشۋ جولدارىن تابۋعا مۇمكىندىك بەرەتىنىن اتاپ ءوتتى. سەميناردا عىلىم جانە جوعارى ءبىلىم سالاسىنداعى باقىلاۋ كوميتەتىنىڭ باسقارما باسشىسى ەلۆيرا ساپاربەكوۆا جالپى ءبىلىم بەرۋ ستاندارتتارىنا قاتىستى يننوۆاسيالار تۋرالى اڭگىمەلەدى. ءبىلىم بەرۋ ساپاسىن ىشكى باقىلاۋ، وقۋ پروسەسىنىڭ مونيتورينگى، سونداي-اق بىلىكتىلىك تالاپتارىن ساقتاماعانى ءۇشىن جاۋاپكەرشىلىكتى كۇشەيتۋ، وسىنىڭ بارلىعى مامانداردى دايارلاۋ ساپاسىن ارتتىرۋعا باعىتتالعان. سونىمەن قاتار باعالاۋدىڭ جاڭا كريتەرييلەرى ءبىلىم بەرۋ باعدارلامالارىنىڭ مازمۇنىن ۇنەمى جاڭارتىپ وتىرۋدى كوزدەيدى، ونى ازىرلەۋگە جۇمىس بەرۋشىلەر مەن وقۋشىلاردىڭ وزدەرى قاتىسۋى كەرەك. سونداي-اق، عىلىمي جۇمىستاردى قاشىقتىقتان قورعاۋ فورماتى وقۋ ورىندارىنىڭ قوعامعا اشىق بولۋىنا مۇمكىندىك بەرەتىنى اتاپ ءوتىلدى.
ەكى كۇندىك سەمينار-كەڭەستە مەملەكەتتىك باقىلاۋدى اۆتوماتتاندىرۋ، مامانداردىڭ بىلىكتىلىك تالاپتارىنا سايكەستىگىن تەكسەرۋ جانە مەملەكەتتىك اتتەستاتتاۋ، سونداي-اق اسكەري، ارناۋلى وقۋ ورىندارىنا وقۋ پروسەسىن ۇيىمداستىرۋ بويىنشا ادىستەمەلىك كومەك كورسەتۋ ماسەلەلەرى تالقىلاندى. القالى باس قوسۋدا بارلىق ءبىلىم بەرۋ ۇيىمدارىنىڭ باسشىلارى الماتى اكادەمياسى باستىعىنىڭ مەملەكەتتىڭ ۇلتتىق قاۋىپسىزدىگىن قامتاماسىز ەتۋدىڭ زاماناۋي ستاندارتتارىنا جاۋاپ بەرەتىن ۆەدومستۆولىق ءبىلىم بەرۋ ساپاسىن ارتتىرۋ قۇرالى رەتىندە قاۋىمداستىق قۇرۋ تۋرالى باستاماسىن ءبىراۋىزدان قولدادى.