قازاقستاندا جەكە تۇلعالارعا بەرىلگەن نەسيەلەردىڭ جالپى سوماسى ءوستى

جىل باسىنان بەرى كورسەتكىش 18،7%-عا وسكەن.

قارجى نارىعىن رەتتەۋ جانە دامىتۋ اگەنتتىگىنىڭ دەرەگىنشە، جەكە تۇلعالارعا بەرىلگەن نەسيەلەر 2022 جىلعى تامىزدا 2،9%-عا ۇلعايىپ، 12،7 ترلن تەڭگەنى قۇرادى، دەپ حابارلايدى Almaty-akshamy.kz Inbusiness.kz cىلتەمە جاساپ.

“نەسيەلەردىڭ وسۋىنە جەڭىلدەتىلگەن مەملەكەتتىك يپوتەكالىق باعدارلامالاردى ىسكە اسىرۋدى جالعاستىرۋ ناتيجەسىندە يپوتەكالىق كرەديتتەۋدىڭ 3،1%-عا 4،1 ترلن تەڭگەگە دەيىن ۇلعايۋى، سونداي-اق تۇتىنۋشىلىق قارىزداردىڭ، ونىڭ ىشىندە جەكە كاسىپكەرلەرگە بيزنەس ماقساتتارعا ارنالعان قارىزدار، 2،3%-عا 7،0 ترلن تەڭگەگە دەيىن ءوسۋى سەبەپ بولدى”، – دەپ حابارلادى قارجى نارىعىن رەتتەۋ جانە دامىتۋ اگەنتتىگى.

بيىلعى جىلدىڭ تامىز ايىندا نەسيە پورتفەلىنىڭ ساپاسى ءبىرشاما جاقساردى.

“سونىمەن، 2022 جىلعى 1 قىركۇيەكتە بانك سەكتورى بويىنشا NPL قارىزدارىنىڭ دەڭگەيى ءبىر ايدا 0،2 پ.ت. نەمەسە 41 ملرد تەڭگەگە ازايىپ، 787 ملرد تەڭگەنى نەمەسە جالپى نەسيە پورتفەلىنىڭ 3،6%-ىن قۇرادى. 2022 جىلعى 1 قاڭتاردا بۇل كورسەتكىش 3،3% نەمەسە 669 ملرد تەڭگە بولعان”، – دەپ حابارلادى اگەنتتىكتە.