قازاقستاندا اسكەري مەديسينا قارقىندى دامىپ كەلەدى
قورعانىس مينيسترلىگىنىڭ اسكەري مەديسينا ورتالىعى مەن اسكەري-كلينيكالىق گوسپيتالى كونفەرەنسيا ۇيىمداستىرىپ، وندا مەديسينا ماماندارى اۋرۋلاردى ۋاقتىلى دياگنوستيكالاۋ جانە ەمدەۋ بويىنشا تاجىريبە الماستى، دەپ حابارلايدى Almaty-akshamy.kz.
عىلىمي فورۋمعا قاتىسۋشىلارعا قورعانىس مينيسترلىگىنىڭ باس اسكەري-مەديسينالىق باسقارماسىنىڭ باستىعى مەديسينا قىزمەتىنىڭ پولكوۆنيگى تيمۋر وشاقبايەۆ ءسوز سويلەدى. ول قازاقستاندا اسكەري مەديسينا قارقىندى دامىپ كەلە جاتقانىن، ال 30 جىل بۇرىن قارۋلى كۇشتەردە قۇرىلعان باسقارۋ ورگاندارى مەن ەمدەۋ مەكەمەلەرىنىڭ قۇرىلىمدارى اسكەري قىزمەتشىلەردىڭ دەنساۋلىعىن ساقتاۋدى جانە اسكەرلەردىڭ جاۋىنگەرلىك ازىرلىگىن قولداۋدى قامتاماسىز ەتەتىنىن اتاپ ءوتتى. سونداي-اق، ەل تاريحىنداعى مەديسينالىق قىزمەتتىڭ جالعىز گەنەرال-مايورى تالعات نۇرماعامبەتوۆتىڭ اسكەري جانە ازاماتتىق مەديسينانىڭ دامۋىنا قوسقان ۇلەسىن دە ايتا كەتتى. ءتىرى بولعاندا ول 27 قازاندا 70 جاسقا تولار ەدى.
جەدەل كلينيكالىق بەلگىلەرى بار پاسيەنتتەردى دياگنوستيكالاۋ، باعىتتاۋ جانە ولارعا جوعارى تەحنولوگيالىق مەديسينالىق كومەك كورسەتۋ ماسەلەلەرىن تالقىلاۋعا اسكەري دارىگەرلەردەن باسقا الماتى قالاسىنداعى ەمدەۋ مەكەمەلەرىنىڭ وكىلدەرى، گاستروەنتەرولوگتار، ينفەكسيونيستەر، تەراپيەۆتتەر، جالپى پراكتيكا دارىگەرلەرى، ەندوسكوپيستەر، حيرۋرگتار جانە ەپيدەميولوگتار قاتىستى.
كونفەرەنسياعا قاتىسۋشىلار مۇنداي كەزدەسۋلەر ەمدەۋ مەكەمەلەرى اراسىنداعى ءوزارا ءىس-قيمىلدى كەڭەيتۋگە، دارىگەرلىك پەرسونالدىڭ كاسىبي ماشىعىن جەتىلدىرۋگە، مەديسينالىق قىزمەتتەردىڭ ساپاسىن ارتتىرۋعا ىقپال ەتەتىنىن اتاپ ءوتتى.