سالتاناتتى اشىلۋ راسىمىنە قورعانىس ءمينيسترىنىڭ ءبىرىنشى ورىنباسارى – قارۋلى كۇشتەر باس شتابىنىڭ باستىعى گەنەرال-لەيتەنانت سۇلتان قامالەتدينوۆ، اكىمدىك پەن قوعام وكىلدەرى، قارۋلى كۇشتەردىڭ ارداگەرلەرى، سونداي-اق جەرگىلىكتى اسكەري باسقارۋ ورگاندارىنىڭ قىزمەتكەرلەرى قاتىستى، - دەپ حابارلايدى Aqshamnews.kz.
جاڭا كوماندالاردى قالىپتاستىرۋ پۋنكتى ازاماتتاردى مەرزىمدى اسكەري قىزمەتكە شاقىرۋ ءىس-شارالارىن ۇيىمداستىرۋ جانە وتكىزۋگە ارنالعان. بۇل ماڭىزدى وقيعا الداعى ءبىر جىل ۇلتتىق ۇلان قۇرامىندا قىزمەت ەتەتىن 45 جاس ساربازدىڭ اقتاۋ قالاسىنا اتتانۋىمەن تۇسپا-تۇس كەلدى.
باس شتاب باستىعى گەنەرال-لەيتەنانت س. قامالەتدينوۆ قاتىسۋشىلاردى ماڭىزدى وقيعامەن قۇتتىقتاپ، جاستاردىڭ وتانىنا قىزمەت ەتۋ جولىنىڭ ءدال وسى جيناۋ پۋنكتىنەن باستالاتىنىن اتاپ ءوتتى.
– جاڭا ينفراقۇرىلىمدىق جوبانى ىسكە قوسۋ بارلىق شاقىرۋ راسىمدەرىن اشىق، تۇسىنىكتى جانە ەڭ باستىسى – ازاماتتارعا ىڭعايلى ەتۋگە باعىتتالعان. مۇندا شاقىرىلاتىن ازاماتتارعا تولىق اقپارات الۋ، ءتيىستى راسىمدەردەن ءوتۋ ءۇشىن بارلىق جاعداي جاسالعان. بۇل جاڭا نىسان قوعام مەن ارميا، مەملەكەت پەن جاستار، بۇگىن مەن بولاشاق اراسىنداعى ماڭىزدى بايلانىس بۋىنىنا اينالادى دەپ سەنەمىن، – دەدى باس شتاب باستىعى.
جيناۋ پۋنكتى ساپالى، ءارى اشىق جۇمىس ىستەۋ ءۇشىن بارلىق قاجەتتى قۇرال-جابدىقتارمەن قامتاماسىز ەتىلگەن. مۇندا مەديسينالىق تەكسەرۋ كابينەتتەرى، پسيحولوگيالىق ىرىكتەۋ بولمەلەرى، كۇتۋ جانە اقپاراتتاندىرۋ ايماقتارى، اكت زالى، سپورت زالى مەن اسحانا بار. بارلىعى شاقىرىلاتىن ازاماتتار مەن قىزمەتكەرلەر ءۇشىن قولايلى جاعداي جاساۋعا باعىتتالعان.
جاڭا جيناۋ پۋنكتىنىڭ اشىلۋى مەملەكەتتىك ورگاندار اراسىنداعى ءوزارا ءىس-قيمىلدى ارتتىرىپ، ازاماتتاردىڭ قۇقىقتارىن ساقتاۋدى قامتاماسىز ەتۋگە، سونداي-اق ولاردى اسكەري بولىمدەرگە جىبەرۋ پروسەسىن باقىلاۋدى كۇشەيتۋگە مۇمكىندىك بەرەدى.
ۇيىمداستىرۋ جانە قىزمەت كورسەتۋ دەڭگەيى بويىنشا ۇلگى بولاتىن بۇل پۋنكت ارميانى تولىقتىرۋ جۇيەسىنىڭ ماڭىزدى ەلەمەنتىنە اينالماق.