ۆيسە-پرەمەر – ۇلتتىق ەكونوميكا ءمينيسترى سەرىك ءجۇمانعاريننىڭ توراعالىعىمەن وتكەن ەكونوميكالىق ءوسۋدى قامتاماسىز ەتۋ جونىندەگى شتابتىڭ كەزەكتى وتىرىسىندا 2025 جىلدىڭ قورىتىندىسى بويىنشا بولجام جانە 2026 جىلى ەكونوميكالىق ءوسۋدى قولداۋدىڭ تاسىلدەرى قارالدى.
وڭدەۋ ونەركاسىبىندە 11 ايعى قورىتىندى بويىنشا نكي 105،9%. ءوسۋ جىل قورىتىندىسى بويىنشا 6% دەڭگەيىندە بولۋى مۇمكىن.
2025 جىلعى قورىتىندى بويىنشا نەگىزگى وڭدەۋ سالالارى ديناميكاسى بولجامى:
- مەتاللۋرگيا (وڭدەۋ قۇرىلىمىندا 40%) – ءوسۋ 1،1%،
- ماشينا جاساۋ (17،5%) – ءوسۋ 12%،
- تاماق ونەركاسىبى (13،1%) – ءوسۋ 9%،
- قۇرىلىس ماتەريالىن ءوندىرۋ (5،6%) – ءوسۋ 6%،
- حيميا ونەركاسىبى (5،4%) – ءوسۋ 6%،
- جەڭىل ونەركاسىپ (0،7%) – ءوسۋ 5%.
شتاب وتىرىسىندا نەگىزگى ەكونوميكالىق ءوسۋ درايۆەرىنىڭ ءبىرى رەتىندە وڭدەۋ ونەركاسىبىن ودان ءارى دامىتۋ بولجامىنا ەرەكشە نازار اۋدارىلدى. ءتۇستى جانە قارا مەتاللۋرگيانى دامىتۋ پەرسپەكتيۆاسى، «بايتەرەك» حولدينگى جەلىسى بويىنشا قارجىلاندىرىلاتىن جوبالاردى ىسكە اسىرۋ، وڭىرلەردەگى ينفراقۇرىلىمنىڭ جاي-كۇيى جانە سالا ءوسىمىنىڭ تۇراقتىلىعىنا اسەر ەتەتىن باسقا دا فاكتورلار قارالدى.
وڭىرلەردىڭ رەسۋرستىق جانە ينفراقۇرىلىمدىق الەۋەتىن نەعۇرلىم ءتيىمدى پايدالانۋ قاجەتتىلىگىن ەسكەرە وتىرىپ، ۆيسە-پرەمەر ەكونوميكالىق ءوسۋ ءۇشىن اسا ماڭىزدى، سونداي-اق جەڭىل ونەركاسىپ پەن قۇرىلىس ماتەريالىن ءوندىرۋدى قولداۋ شارالارىنا نازار اۋدارا وتىرىپ، وڭدەۋ ونەركاسىبىندەگى ءوسۋ قارقىنىن قامتاماسىز ەتۋ جونىندەگى جول كارتاسىن دايىنداۋدى تاپسىردى.
ساۋدا-ساتتىقتا نكي 11 ايدا 8،8% وسكەن كەزدە جىل قورىتىندىسى بويىنشا 8،9% بولۋى مۇمكىن. ساۋدانىڭ وسۋىنە جيناقتالعان ۇلەستىڭ شامامەن 72%-ىن بەس ايماق قامتاماسىز ەتەدى:
- الماتى – 24،6 ترلن تەڭگە (اۆتوموبيلدەر، ماشينالار مەن جابدىقتار ساۋداسى، فارماسيەۆتيكالىق ونىمدەر، شوكولاد)؛
- استانا – 10،9 ترلن تەڭگە (تابيعي گاز، ديزەل وتىنى، اۆياسيالىق بەنزين مەن كەروسين، ەت جانە ءسۇت ونىمدەرىن ساتۋ)؛
- اتىراۋ وبلىسى – 6،7 ترلن تەڭگە (مۇناي ونىمدەرى، ماشينالار مەن جابدىقتار)؛
- قاراعاندى وبلىسى – 4،5 ترلن تەڭگە (فارماسيەۆتيكالىق تاۋارلار، ماشينالار مەن جابدىقتار، كوسمەتيكالىق ونىمدەر)؛
- شىمكەنت – 3،6 ترلن تەڭگە (فارماسيەۆتيكالىق ءونىم، ججم، اوك ءونىمى).
760 مىڭعا جۋىق بيزنەس سۋبەكتىسى بار بولشەك ساۋدا قۇرىلىمىندا جەكە كاسىپكەرلەردىڭ تاۋار اينالىمى 10%-عا ءوسىپ، 8،2 ترلن تەڭگەگە جەتتى. جەدەل دەرەكتەر بويىنشا، 11 ايداعى ونلاين ساتۋ كولەمى 3،3 ترلن تەڭگە. بۇل وتكەن جىلعى سايكەس كەزەڭمەن سالىستىرعاندا 14،4%-عا ارتىق.
اۋىل شارۋاشىلىعى بارلىق باعىت بويىنشا تۇراقتى ءوسۋدى كورسەتەدى. 11 ايعى قورىتىندى بويىنشا نكي 106،1%. ءوسۋ جىل قورىتىندىسى بويىنشا 5% دەڭگەيىندە. بۇل جوسپارلى كورسەتكىشتەن 3%-عا ارتىق.
ورتاشا رەسپۋبليكالىق دەڭگەيدەن جوعارى ءوسۋ اقمولا (115،7%)، قوستاناي (115،4%)، سولتۇستىك قازاقستان (110،5%)، پاۆلودار (108،2%)، اتىراۋ وبلىستارىندا (107،4%) تىركەلدى.
ءداستۇرلى داقىلداردىڭ تۇراقتى جوعارى ونىمدىلىگى اياسىندا بيىل جوعارى مارجينالدى مايلى جانە بۇرشاق داقىلى ايتارلىقتاي وسۋگە اسەر ەتتى. بۇرشاق داقىلىنان 1،1 ملن-نان اساتىن رەكوردتىق ءونىم الىندى. العاش رەت مايلى داقىل ءوندىرىسى كولەمى 4،7 ملن تونناعا جەتتى. ماقتا جيناۋ – 428 مىڭ توننا. ونىڭ ونىمدىلىگى 29،6 س/گا. بۇل – سوڭعى 18 جىلداعى ەڭ جوعارى كورسەتكىش.