بالالاردى قىزىلشاعا قارسى پاندەميادان قالعان بەلگىسىز قىتايلىق ۆاكسينامەن ەگىپ جاتقانى راس پا؟

الەۋمەتتىك جەلىلەردە بالالاردى قىزىلشاعا قارسى بەلگىسىز قىتايلىق پرەپاراتپەن ماجبۇرلەپ ەگىپ جاتقانى تۋرالى اقپارات تارادى.

اۆتوردىڭ پايىمداۋىنشا، بۇل كوروناۆيرۋستىق ۆاكسيناسيادان قالعان ەكپە بولۋى مۇمكىن. بۇل اقپاراتتى ق ر دەنساۋلىق ساقتاۋ مينيسترلىگى جوققا شىعاردى، دەپ حابارلايدى Almaty-akshamy.kz Stopfake.kz-كە سىلتەمە جاساپ. 

«قازاقستان رەسپۋبليكاسىنىڭ حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكسىنىڭ 85-بابىنىڭ 4-تارماعىنا سايكەس، قازاقستان رەسپۋبليكاسىنىڭ اۋماعىندا تۇراقتى بولاتىن جەكە تۇلعالار ينفەكسيالىق جانە پارازيتتىك اۋرۋلارعا قارسى مىندەتتى پروفيلاكتيكالىق ەكپەلەردى الۋعا مىندەتتى. سونىمەن قاتار، كودەكستىڭ 77-بابىنا سايكەس، ەگىلەتىن ادامنىڭ نە ونىڭ زاڭدى وكىلىنىڭ پروفيلاكتيكالىق ەكپەلەردى جۇرگىزۋگە حاباردار ەتىلگەن كەلىسىم بەرۋگە نەمەسە ولاردان باس تارتۋعا قۇقىعى بار. ەلدە قىزىلشاعا قارسى ۆاكسيناسيا جۇرگىزۋ ءۇشىن «Serum Institute of India» شىعارعان قىزىلشاعا، قىزامىققا جانە پاروتيتكە قارسى ارالاس ۆاكسينا قولدانىلادى. بۇل ۆاكسينانىڭ ءوندىرىسى ددۇ-نىڭ قايتا باعالاۋىنان وتكەن، وندىرىلەتىن ۆاكسينالاردىڭ ساپاسى مەن قاۋىپسىزدىگىنە كەپىلدىك بەرىلەدى»، – دەلىنگەن دەنساۋلىق ساقتاۋ مينيسترلىگىنىڭ حابارلاماسىندا.

دەنساۋلىق ساقتاۋ مينيسترلىگىنىڭ اتا-انالارعا جاساعان ۇندەۋىندە بىلاي دەلىنگەن: «ەلدەگى قىزىلشا بويىنشا قولايسىز ەپيدەميولوگيالىق جاعدايدى ەسكەرە وتىرىپ، بالالاردا قىزىلشاعا قارسى ەكپەلەردىڭ بولۋىنا نازار اۋدارۋلارىڭىزدى سۇرايمىز». ەكپەنى تىركەلگەن جەرى بويىنشا مەديسينالىق ۇيىمعا جۇگىنىپ، الۋعا بولادى.