19 ايەلدە ءسۇت بەزى قاتەرلى ىسىگىنە كۇدىك انىقتالدى
وتكەن سەنبىدە الماتىدا ايەلدەر اراسىندا ءسۇت بەزى قاتەرلى ىسىگىنىڭ الدىن الۋ ماقساتىندا اۋقىمدى اكسيا ءوتتى، دەپ حابارلايدى Almaty-akshamy.kz.
الماتى قوعامدىق دەنساۋلىق ساقتاۋ باسقارماسىنىڭ مالىمەتىنشە، بۇل كۇنى قالانىڭ 17 مەديسينالىق ۇيىمىندا اشىق ەسىك كۇنى ءوتىپ، وندا 839 ايەل ونكو-ماممولوگ مامانداردان تەگىن كەڭەس الدى. ناۋقان مۇمكىندىگىنشە كوپ ايەلدىڭ دەنساۋلىعىن تەكسەرۋ ءۇشىن دەمالىس كۇنى وتكىزىلدى.
بۇل كۇنى الدىن الا جازىلۋسىز جانە جولداماسىز ماممولوگ ماماننىڭ كەڭەسىن الىپ، قاجەتتى زەرتتەۋلەردەن – ءسۇت بەزدەرىنىڭ ۋلترادىبىستىق جانە مامموگرافياسىنان وتۋگە مۇمكىندىك بولدى. جۇرگىزىلگەن تەكسەرۋ ناتيجەسىندە 19 ايەلدە ءسۇت بەزى قاتەرلى ىسىگىنە كۇدىك انىقتالدى. انىقتالعان پاتولوگياسى بار ايەلدەرگە الماتى ونكولوگيالىق ورتالىعىندا ودان ءارى تەكسەرۋ جانە ەمدەۋ بويىنشا ۇسىنىستار بەرىلدى. قالالىق ونكولوگيالىق ديسپانسەردىڭ باس دارىگەرى نۇرسۇلتان ىزباعامبەتوۆ بۇل شارا جىل سايىن قازان ايىندا الەمنىڭ ءتۇرلى ەلدەرىندە وتەتىن دۇنيەجۇزىلىك كامپانيا – ءسۇت بەزى وبىرىنا قارسى كۇرەس ايلىعىنا ورايلاستىرىلىپ وتىرعانىن ايتتى.
«ناۋقان ءسۇت بەزى ىسىگىن ەرتە انىقتاۋ، دەر كەزىندە ەمدەۋدى باستاۋ جانە ءولىم-جىتىم دەڭگەيىن تومەندەتۋ ءۇشىن ايەلدەردى سكرينينگتەن وتكىزۋگە باعىتتالعان. قىمباتتى دا اياۋلى ارۋلار، قازاننىڭ 1-ىنەن ايدىڭ ءار سەنبىسىندە ورتالىقتا ءسۇت بەزى قاتەرلى ىسىگىنىڭ پروفيلاكتيكالىق تەكسەرۋلەرى جۇرگىزىلەتىنىن تاعى دا ەسكە سالعىم كەلەدى. بارلىق ايەلدەردى تەكسەرۋدەن وتۋگە شاقىرامىز»، - دەدى ول.
ەستەرىڭىزگە سالا كەتەيىك، 30-40 جاس ارالىعىنداعى ءاربىر ساۋ ايەل جىلىنا ءبىر رەت ءسۇت بەزىنىڭ ۋلترادىبىستىق زەرتتەۋىنەن ءوتۋى كەرەك. 40 جاستان اسقان ايەلدەر 2 جىلدا ءبىر رەت مامموگرافيادان ءوتۋى ءتيىس.
گينەكولوگ پەن ماممولوگقا ۇنەمى قارالۋمەن بىرگە ءوزىن-وزى تەكسەرۋ ەرتە كەزەڭدە ءسۇت بەزىندەگى وزگەرىستى انىقتاۋعا كومەكتەسەدى. بۇل وتە ماڭىزدى. ءسۇت بەزدەرىن ءوزىن-وزى تەكسەرۋ جۇيەلى تۇردە ايىنا ءبىر رەت ەتەككىر سيكلىنىڭ 7-10-شى كۇندەرىندە ۇسىنىلادى. مەنوپاۋزا كەزىندە بەلگىلى ءبىر كۇندە، مىسالى، ءار ايدىڭ ءبىرىنشى كۇنى تۇراقتى تەكسەرۋدەن ءوتۋ كەرەك.
ەستەرىڭىزدە بولسىن، ەرتە دياگنوستيكا ءومىرىڭىزدى امان ساقتاپ قالادى!