الماتىدا باسبۇزارلار جەدەل جاردەم كولىگىنە كەدەرگى جاساپ، مەديسينا قىزمەتكەرلەرىنە زاقىم كەلتىرىپ، الەۋمەتتىك نىسانداردى قيراتىپ جاتىر. بۇل تۋرالى الماتى قالاسى كومەنداتۋراسىنىڭ اقپاراتتىق ورتالىعى ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتى قالاسى قوعامدىق دەنساۋلىق باسقارماسىنىڭ مالىمەتىنشە، اگرەسسيۆتى ازاماتتار مەگاپوليستىڭ ەمحانالارى مەن اۋرۋحانالارىنا كىرىپ، مەديسينالىق مەكەمەلەردىڭ مۇلىكتەرى مەن جابدىقتارىنا زيان كەلتىرۋدە.
«زاڭسىز ارەكەتتەردىڭ سالدارىنان جەدەل جاردەمنىڭ 5 قىزمەتكەرى، ونىڭ ىشىندە 2 جۇرگىزۋشى مەن 3 مەديسينا قىزمەتكەرى زارداپ شەكتى. زارداپ شەككەندەر قالالىق ستاسيونارلارعا جەتكىزىلدى»، – دەلىنگەن حابارلامادا.
سونىمەن قاتار، 2 جەدەل جاردەم كولىگى جويىلىپ، قالالىق كارديولوگيالىق ورتالىقتا قابىلداۋ بولمەسى مەن كلينيكالىق-دياگنوستيكالىق بولىمشەنىڭ اينەكتەرى سىنعان.
«المالى اۋدانىنىڭ امسك عيماراتىندا ۆانداليزم اكتىسى تىركەلدى. ناۋرىزباي اۋدانىندا №7 قكا قابىلداۋ بولمەسىنە پاسيەنتپەن جەدەل جاردەم كولىگىنىڭ قاتىناۋى توقتاتىلدى. سونىمەن قاتار، دەسترۋكتيۆتى ارەكەتتەردى جاقتاۋشىلار جەدەل جاردەم كولىگىن توقتاتىپ، بالالاردى اۋرۋحانالارعا جاتقىزۋعا جول بەرمەيدى»، – دەپ حابارلادى باسقارمادان.
بۇل ارەكەتتەر پاسيەنتتەرگە ۋاقتىلى مەديسينالىق كومەك كورسەتۋگە كەدەرگى كەلتىرەدى جانە ازاماتتاردىڭ دەنساۋلىعى مەن ومىرىنە ءقاۋىپ توندىرەدى.