قازاقستاندىقتار مەملەكەتتىك ءبىلىم بەرۋ جيناقتاۋ جۇيەسى اياسىندا 21 مىڭنان استام ءبىلىم بەرۋ دەپوزيتتەرىن اشتى.
بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا ق ر بعم «قارجى ورتالىعى» اق ىلگەرىلەتۋ جانە سىرتقى كوممۋنيكاسيالار دەپارتامەنتىنىڭ ديرەكتورى الپامىس ساتىبالدين مالىمدەدى، دەپ حابارلايدى Almaty-akshamy.kz
ەسكە سالساق، 2013 جىلدان باستاپ ەل تۇرعىندارى وزدەرىنىڭ ءبىلىم الۋىنا نەمەسە بالالارىنىڭ ءبىلىم الۋىنا اقشالاي قاراجات جيناي الادى. بۇل ءۇشىن AQYL ءبىلىم بەرۋ جيناقتاۋ سالىمى قۇرىلدى.
ونىڭ باستى ارتىقشىلىعى – بانكتىك سىياقىدان باسقا 9%-عا دەيىن سالىمدارعا مەملەكەتتىك سىيلىقاقى ەسەپتەلەدى. مەملەكەت سىيلىقاقىسىنىڭ مولشەرى – جىلدىق 5%، الەۋمەتتىك وسال حالىق ساناتى ءۇشىن – 7%.
«دەپوزيتتىڭ قاتاڭ نىسانالى ماقساتى بار: جيناقتالعان قاراجات قر-دا دا، شەتەلدە دە وقۋ اقىسىن تولەۋگە پايدالانىلۋى ءتيىس. سالىمشى بالانىڭ اتىنا نەمەسە قاتىسۋشى بانكتە وزىنە ءبىلىم بەرۋ سالىمىن اشادى، جيناقتاۋدىڭ ىقتيمال مەرزىمىن، جيناقتاۋدىڭ بولجامدى سوماسىن جانە جارنالاردىڭ كەزەڭدىلىگىن دەربەس ايقىندايدى»، - دەپ ءتۇسىندىردى ا. ساتىبالدين.
قازىرگى ۋاقىتتا ءبىلىم بەرۋ دەپوزيتىن اشۋعا بولاتىن قاتىسۋشى بانكتەر: «قازاقستان حالىق بانكى» اق، سىياقى مولشەرلەمەسى – 9%؛ «Jysan Bank» اق، سىياقى مولشەرلەمەسى – 8،3%؛ «بانك ۆتب» اق ەۇ، سىياقى مولشەرلەمەسى – 8،8%؛ «نۇربانك» اق، سىياقى مولشەرلەمەسى – 9%.
جوو-عا نەمەسە كوللەدجگە اقىلى نەگىزدە تۇسكەننەن كەيىن سالىمشى دەپوزيت اشىلعان بانككە جوو/كوللەدجبەن شارت ۇسىنادى، بانك وقۋ اقىسىن سالىمشىنىڭ شوتىنان تىكەلەي ءبىلىم بەرۋ ۇيىمىنا اۋدارادى. ەگەر وقۋدىڭ بارلىق مەرزىمىن تولەگەننەن كەيىن دەپوزيتتە قاراجات قالسا، سالىمشى ولاردى الىپ تاستاۋعا قۇقىلى.
بالا گرانتقا تۇسكەن جاعدايدا سالىمشى بارلىق قاراجاتتى بانك سىياقىسىمەن جانە مەملەكەت سىيلىقاقىسىمەن بىرگە الۋعا نەمەسە ولاردى ماگيستراتۋراعا تولەۋگە جۇمساۋعا قۇقىلى.