اپاتتى اعاشتار – اۋدانداعى وتكىر ماسەلە.
الماتىدا اۋەزوۆ اۋدانى تۇرعىندارىنىڭ وتىنىشىنە وراي اپاتتى اعاشتاردى سانيتارلىق كەسۋ بويىنشا باسپا ءسوز تۋرى ءوتتى، دەپ حابارلايدى Almaty-akshamy.kz.
اۋەزوۆ اۋدانىنىڭ تۇرعىندارى اپاتتى اعاشتاردى سانيتارلىق كەسۋ ءۇشىن جەرگىلىكتى اتقارۋشى ورگاندارعا جۇگىندى. بارلىعى 247 ءوتىنىش بەرىلدى.
باسپا ءسوز تۋرى بارىسىندا ب ا ق وكىلدەرىنە سانيتارلىق كەسۋگە ارنالعان ۋچاسكەلەر كورسەتىلدى. بۇل – اۋلا ىشىندەگى اۋماقتار مەن كوشەلەر.
«اپاتتى اعاشتار – اۋدانداعى وتكىر ماسەلە. اسىرەسە، ءقازىر اۋلالاردى كۇردەلى جوندەۋدەن وتكىزە باستاعان كەزدە. ءبىز اكىمدىكتەن اپاتتى اعاشتاردىڭ بۇتاقتارىن كەسۋدى سۇرادىق»، - دەدى اۋدان تۇرعىنى سۆەتلانا تيتوۆا.
سانيتارلىق كەسۋدى جاسىل جەلەكتەردى وتىرعىزۋ جانە كۇتىپ ۇستاۋ جونىندەگى مەردىگەرلىك ۇيىمدار جۇرگىزەدى. اۋەزوۆ اۋدانى اكىمدىگىنىڭ ەكولوگيا ءبولىمى باقىلاۋدى جۇزەگە اسىرادى. اۋداندا بارلىعى 254 764 اعاش بار، ونىڭ 66 825ء-ى سانيتارلىق كەسۋگە، ال 6287ء-ى كەسىپ تاستاۋعا جاتادى.
«قازىرگى ۋاقىتتا اۋلالارداعى اپاتتى اعاشتاردىڭ قۋراعان بۇتاقتارىن سانيتارلىق كەسۋ جۇمىستارى جۇرگىزىلۋدە. اعاش كەسۋدى باستاماس بۇرىن، ءار اۋلادا تۇرعىندارمەن كەزدەسۋ وتەدى، ولاردىڭ پىكىرلەرى جۇمىس كەزىندە ەسكەرىلەدى. ءۇي يەلەرنىڭ ءبارىن وزدەرى جاساۋعا قاراجاتتارى مەن مۇمكىندىكتەرى بولا بەرمەيدى. بيىلعى كوكتەمدە قار مەن مۇز ەرىگەن كەزدە 200-گە جۋىق اعاش قۇلاعانى، سونىڭ سالدارىنان 17 كولىكتىڭ زاقىمدانعانى تىركەلدى. اپاتتى اعاشتاردى كەسۋ جۇمىستارى حالىقتىڭ ومىرىنە، دەنساۋلىعىنا قاۋىپ ءتوندىرۋدىڭ ءارى جەكە مۇلىككە زيان كەلتىرۋدىڭ الدىن الادى»، - دەدى اۋەزوۆ اۋداندىق قورشاعان ورتانى قورعاۋ جانە ەكولوگيا بولىمشەسىنىڭ باسشىسى ءاليزات سەيتبايەۆ.
ساراپشىلاردىڭ ايتۋىنشا، سانيتارلىق كەسۋ اعاشتاردىڭ ءپىشىنىن جاقسارتۋ، وسىمدىكتەردىڭ ءوسۋىن، دامۋىن جانە ونىڭ ۇزاق گۇلدەنۋىن رەتتەۋ ءۇشىن جاسالادى.
«كەسۋدىڭ 3 ءتۇرى بار: سانيتارلىق، جاسارتۋ جانە قالىپتاۋ. سانيتارلىق كەسۋ جىل سايىن جانە كۇنتىزبەلىك جىل ىشىندە جۇرگىزىلۋى كەرەك. ول اۋرۋ، كەپكەن، سىنعان، سالبىراپ تۇرعان، زاقىمدالعان، سونداي-اق اعاشتىڭ باسىنداعى قۋراعان بۇتاقتارعا جۇرگىزىلەدى. ال اعاشتاردى جاسارتۋ ءۇشىن كەسۋ اعاش جىل سايىنعى ءوسۋدى توقتاتقان كەزدە جاسالادى. قالىپتىق كەسۋ اعاشتىڭ جاساندى ءپىشىنىن جاساۋ جانە ساقتاۋ ءۇشىن جۇرگىزىلەدى»، - دەدى ا. بوكەيحانوۆ اتىنداعى ورمان شارۋاشىلىعى جانە اگروورمانمەليوراسيا قازعزي الماتى فيليالىنىڭ ديرەكتورى رۋسلان احمەتوۆ.