پارتيانىڭ الماتى قالالىق فيليالىندا AMANAT فراكسياسىنىڭ وتىرىسى ءوتتى.
جيىندا قالا باسشىلىعىنىڭ جول كارتاسىن جۇزەگە اسىرۋ بويىنشا ەسەبى تىڭدالدى، دەپ حابارلايدى Almaty-akshamy.kz
فراكسيا جۇمىسىنا قالالىق فيليالدىڭ اتقارۋشى حاتشىسى م. وتىنشييەۆ، الماتى قالالىق ءماسليحاتىنداعى فراكسيا جەتەكشىسى ل. يبراگيموۆا، دەپۋتاتتىق فراكسيا مۇشەلەرى مەن اۋداندىق فيليالداردىڭ ءتوراعالارى-اۋدان اكىمدەرى، سونداي-اق مەگاپوليستىڭ مەملەكەتتىك ورگاندارىنىڭ باسشىلارى جانە ت.ب. قاتىستى.
قالالىق ءماسليحاتتاعى فراكسيا جەتەكشىسى ءلاززات يبراگيموۆانىڭ ايتۋىنشا، مەگاپوليستە الەۋمەتتىك، ينجەنەرلىك، جول-كولىك ينفراقۇرىلىمىن جاقسارتۋ بويىنشا كوپتەگەن جوبالار جۇزەگە اسىرىلۋدا، ولاردىڭ ورىندالۋى دەپۋتاتتاردىڭ، بيۋرو مۇشەلەرىنىڭ جانە پارتيا فيليالى ساياسي كەڭەسىنىڭ باقىلاۋىندا.
پارتيانىڭ سايلاۋالدى باعدارلاماسىن ورىنداۋ جونىندەگى جول كارتاسى اياسىندا الماتى قالاسىندا 2021 جىلى 79 بالاباقشا اشىلدى، الاتاۋ جانە ناۋرىزباي اۋداندارىندا 5،1 مىڭ ورىندىق 3 مەكتەپتىڭ قۇرىلىسى اياقتالدى، مەكتەپتەرگە 8 مىڭ ورىندىق 16 قوسىمشا قۇرىلىس سالىندى.
«شەتسىز قالا» باعىتى بويىنشا دا جۇمىستار جالعاسۋدا. وسىلايشا، حالىقتىڭ سۋمەن جابدىقتاۋ قىزمەتتەرىنە قول جەتكىزۋ دەڭگەيى 98،5%-عا دەيىن جەتكىزىلدى، ال گازبەن جابدىقتاۋعا قول جەتكىزۋ 99،2%-دى قۇرادى. بۇدان بولەك، جەكە سەكتورداعى 2 مىڭنان استام ءۇي تابيعي گازعا كوشىرىلدى.
سونىمەن قاتار، جول ينفراقۇرىلىمىن جاقسارتۋ بويىنشا جوبالاردى ىسكە اسىرۋ بارىسى قارالدى. رىسقۇلوۆ داڭعىلى مەن ەمسوۆ كوشەسىندەگى جول ايرىعى اياقتالىپ، اباي داڭعىلى بويىنشا قوزعالىس اشىلدى. سونداي-اق، وتكەن جىلى الاتاۋ، ناۋرىزباي جانە تۇركسىب اۋداندارىنىڭ 8 شاعىناۋدانىندا 65 كم جاڭا جول سالىندى. ۇزىندىعى 201 كم 206 كوشەگە ورتاشا جوندەۋ جۇمىستارى قامتىلدى.
سونىمەن قاتار، وتىرىستا قالالىق فيليالدىڭ اتقارۋشى حاتشىسى مەيىرجان وتىنشييەۆ وڭىرلىك قوعامدىق كەڭەستەردىڭ سانىن 11-دەن 8-گە دەيىن وڭتايلاندىرۋ تۋرالى حابارلاپ، جاڭا ءتوراعالاردى تانىستىردى.
سونىمەن، ەكونوميكانى دامىتۋ جانە كاسىپكەرلىكتى قولداۋ جونىندەگى قوعامدىق كەڭەستى دەپۋتات قايرات قۇدايبەرگەن، وتباسى جانە حالىقتى الەۋمەتتىك قورعاۋ ماسەلەلەرى جونىندەگى كەڭەستى راحات شيماشيەۆا، وڭىرلىك دامۋ جانە ەكولوگيا ماسەلەلەرى جونىندەگى كەڭەستى شۋحراد شاردينوۆ، ءبىلىم بەرۋ جانە دەنساۋلىق ساقتاۋ ماسەلەلەرى جونىندەگى كەڭەستى بولات سادىقوۆ، سىبايلاس جەمقورلىققا قارسى ءىس-قيمىل كەڭەسىن ەربولات قاسىموۆ باسقاردى. ال قالعان ءۇش كەڭەستىڭ باسشىلارى ءوز جۇمىستارىن جاڭا قۇراممەن جانە بەكىتىلگەن جىلدىق جۇمىس جوسپارىنىڭ جوباسىمەن جالعاستىراتىن بولادى.
وتىرىس بارىسىندا پروبلەمالىق ماسەلەلەر قارالىپ، ولاردى شەشۋ ءۇشىن اكىمدىكتىڭ قۇرىلىمدىق بولىمشەلەرىنە ءبىرقاتار تاپسىرمالار بەرىلدى. ءوز كەزەگىندە، پارتيانىڭ قالالىق فيليالى بارلىق سايلاۋالدى ۋادەلەرىنىڭ ۋاقىتىلى ورىندالۋىن باقىلاۋدى كۇشەيتەتىنىن مالىمدەدى.