الماتىدا قالا تۇرعىندارىنىڭ موبيلدىلىگىن ارتتىرۋ ماقساتىندا كوشە-جول جەلىسىن دامىتۋ جۇمىستارى جالعاسىپ جاتىر. قالالىق موبيلدىلىك باسقارماسى ىشكى ماگيسترالدىق كوشەلەردى ۇزارتۋ جۇمىستارىنىڭ بارىسى جايلى حابارلادى.
بۇگىندە تولە بي كوشەسىن ياسساۋي كوشەسىنەن قالا شەكاراسىنا دەيىن ۇزارتۋ بويىنشا جەر تەلىمدەرىن ساتىپ الۋعا بايلانىستى جول-قۇرىلىس جۇمىستارى جانە ينجەنەرلىك جەلىلەردى قايتا قۇرۋ جۇرگىزىلىپ جاتىر. ۇزىندىعى 4،5 كم جوبا ەكى ۋچاسكەگە بولىنگەن. جۇمىس 2025 جىلدىڭ سوڭىنا دەيىن اياقتالادى.
- بيىل ۇزىندىعى 4،3 كم بولاتىن حمەلنيسكيي كوشەسىن «قايرات» شاعىن اۋدانىنان تالعار تاس جولىنا دەيىن ۇزارتۋ جانە رايىمبەك داڭعىلىن جەتىسۋ كوشەسىنەن تالعار تاس جولىنا دەيىن ۇزارتىپ سالۋ بويىنشا قۇرىلىس-مونتاجداۋ جۇمىستارىن باستاۋ جوسپارلانعان.
- سونىمەن قاتار، بيىل ۇزىندىعى 0،6 كم بولاتىن مۇقانوۆ كوشەسىن رايىمبەك داڭعىلىنان ماقاتايەۆ كوشەسىنە دەيىن ۇزارتۋ جۇمىستارى باستالادى. وسى اۋماقتار بويىنشا جوبالىق قۇجاتتاما ازىرلەنىپ، ساراپتامادا جاتىر.
- جەر تەلىمىنىڭ الىنۋىنا قاراي جۇبانوۆ كوشەسىن مومىش ۇلى كوشەسىنەن قالا شەكاراسىنا دەيىن ۇزارتۋ جۇمىستارى جۇرگىزىلەدى. جوبا بويىنشا جالپى ۇزىندىعى 3،9 كم بولاتىن 2 كەزەك قاراستىرىلعان. اياقتالۋ مەرزىمى - 2026 جىلدىڭ سوڭىنا دەيىن.
- بۇعان قوسا، بيىل ۇزىندىعى 0،3 كم بولاتىن وڭعارسىنوۆا كوشەسىن رايىمبەك داڭعىلىنا دەيىن ۇزارۋ جۇمىستارىن باستاۋ جوسپارلانىپ وتىر. قازىرگى تاڭدا جوبالاۋ-سمەتالىق قۇجاتتاما ازىرلەنىپ جاتىر.
ەستەرىڭىزگە سالا كەتەيىك، بۇعان دەيىن باسقارما وسى جىلدىڭ سوڭىندا سەيفۋللين داڭعىلى مەن جانسۇگىروۆ كوشەسىنىڭ قيىلىسىنداعى جولايىرىق اشۋدىڭ جوسپارلانىپ وتىرعانىن حابارلاعان بولاتىن. بيىلعى جىلدىڭ 3-توقسانىندا سايىن كوشەسى مەن موڭكە بي كوشەسىنىڭ قيىلىسىندا جولايىرىقتى پايدالانۋعا بەرۋ كوزدەلگەن. سونىمەن بىرگە، جىل سوڭىنا دەيىن سايىن كوشەسىن رىسقۇلوۆ داڭعىلىنان اقىن سارا كوشەسىنە دەيىن جانە اباي داڭعىلىن سترويتەلنايا كوشەسىنەن قالا شەكاراسىنا دەيىن ۇزارتۋ جۇمىستارى اياقتالادى.