الماتىدا بولاشاق انالارعا ارنالعان سكرينينگتىڭ ەۋروپالىق ستاندارتى قولجەتىمدى بولادى
قازاقستان رەسپۋبليكاسىندا العاش رەت الماتى قالاسىنداعى پەريناتولوگيا جانە بالالار كارديوحيرۋرگياسى ورتالىعىندا ساراپتامالىق دەڭگەيدەگى ۋلترادىبىستىق زەرتتەۋ، بيوحيميالىق سكرينينگ جانە گەنەتيكالىق كەڭەس بەرۋدى قامتيتىن «ءبىر كۇندىك كلينيكا» پيلوتتىق جوباسى ىسكە قوسىلدى.
ەگەر حروموسومالىق پاتولوگيانىڭ ماركەرى انىقتالسا نە حروموسومالىق اۋىتقۋدىڭ ءقاۋىپ دەڭگەيى شەكتى ماننەن جوعارى بولسا، پاسيەنت مۋلتيديسيپلينارلىق كونسۋلتاسياعا جىبەرىلەدى. وسىدان كەيىن داۋن، پاتتاۋ، ەدۆاردس، شەرەشيەۆسكيي-تەرنەر جانە كلاينفەلتەر سيندرومى سياقتى ءجيى كەزدەسەتىن تۋا بىتكەن پاتولوگيالاردى انىقتاۋعا مۇمكىندىك بەرەتىن سيتوگەنەتيكالىق زەرتتەۋ جۇرگىزىلەدى.
زەرتحانالىق جانە گەنەتيكالىق زەرتتەۋلەر پرەناتالدى دياگنوستيكا بويىنشا Fetal Medicine Foundation جەتەكشى ەۋروپالىق ۇيىمنىڭ جابدىعىندا جۇزەگە اسىرىلادى.
بۇل جوبا قازاقستان رەسپۋبليكاسى دەنساۋلىق ساقتاۋ مينيسترلىگى، الماتى قالاسى اكىمدىگى جانە «AYALA» قايىرىمدىلىق قورىنىڭ ناتيجەلى ىنتىماقتاستىعى ارقاسىندا جۇزەگە اسىرىلدى.
«ءبىر كۇندىك كلينيكانىڭ» اشىلۋىنا: قازاقستان رەسپۋبليكاسى دەنساۋلىق ساقتاۋ مينيسترلىگى انا مەن بالا دەنساۋلىعىن قورعاۋ دەپارتامەنتى ديرەكتورى ماعريپا ەمبەرگەنوۆا، قازاقستان رەسپۋبليكاسى دەنساۋلىق ساقتاۋ مينيسترلىگى دەنساۋلىق ساقتاۋ باسقارماسىنىڭ باسشىسى شاكيزات حالىقوۆا، الماتى قالاسى اكىمىنىڭ ورىنباسارى اسەم ءنۇسىپوۆا، الماتى قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى نازگۇل يمانعالييەۆا جانە باسقالار قاتىستى.
«وكىنىشكە قاراي، سوڭعى 10 جىلدا قازاقستان رەسپۋبليكاسىندا تۋا بىتكەن اۋىتقۋى بار بالالاردىڭ تۋۋ جيىلىگى تومەندەگەن جوق. پرەناتالدى سكرينينگتى جاقسارتۋ، پراكتيكالىق تاجىريبەنى قابىلداۋ جانە ونى قازاقستان رەسپۋبليكاسىندا ەنگىزۋ ماقساتىندا دەنساۋلىق ساقتاۋ مينيسترلىگىنىڭ ماماندارى باس گەنەتيك جانە پرەناتالدىق دياگنوستيكا جونىندەگى باس ۋدز مامانى ەلىمىزدىڭ مەديسينالىق-گەنەتيكالىق قىزمەتىنىڭ تيىمدىلىگىنە اۋديت جۇرگىزىپ، حالىقارالىق تاجىريبەنى زەردەلەدى. وسىعان بايلانىستى مينيسترلىك ۇرىقتىڭ تۋا بىتكەن اقاۋىن ەرتە دياگنوستيكالاۋ جانە الدىن الۋ تيىمدىلىگىن ارتتىرۋعا، نارەستە ءولىمىن جانە بالالار مۇگەدەكتىگىن تومەندەتۋگە باعىتتالعان پرەناتالدىق مەديسينا قىزمەتىن ودان ءارى جەتىلدىرۋ بويىنشا ءبىرقاتار ستراتەگيالىق شەشىمدى نەگىزدەدى، ولاردى ءوز كەزەگىندە حالىقارالىق ساراپشىلار وڭ باعالادى. پرەناتالدى ۋلترادىبىستىق دياگنوستيكا جانە مەديسينالىق گەنەتيكا بويىنشا جەتەكشى ساراپشىلاردان تۇراتىن ساراپشىلار توبى قۇرىلدى. توپ قازاقستان رەسپۋبليكاسىنداعى پرەناتالدى سكرينينگ ەرەجەلەرىن قايتا قاراۋعا قاتىستى. العاش رەت قازاقستان رەسپۋبليكاسىندا پرەناتالدىق مەديسينا قىزمەتىنىڭ جۇمىسىن رەتتەيتىن نورماتيۆتىك قۇجات - پرەناتالدى ۋلترادىبىستىق دياگنوستيكانى ۇيىمداستىرۋ جانە مەديسينالىق-گەنەتيكالىق كومەك كورسەتۋ ستاندارتتارى ازىرلەندى، «ۇرىقتى قورعاۋ» رەسپۋبليكالىق ورتالىعى قۇرىلىپ، 20 ايماقتا «ۇرىقتى قورعاۋ ورتالىعىنىڭ» جۇمىسى ۇيىمداستىرىلدى»، - دەيدى ق ر دەنساۋلىق ساقتاۋ مينيسترلىگىنىڭ مەديسينالىق كومەكتى ۇيىمداستىرۋ دەپارتامەنتىنىڭ ديرەكتورى ماعريپا ەمبەرگەنوۆا.
الماتى قالاسى پەريناتولوگيا جانە بالالار كارديوحيرۋرگياسى ورتالىعى تۋا بىتكەن جۇرەك اقاۋىن پرەناتالدىق دياگنوستيكالاۋعا جانە جۇكتىلىك كەزىندە ءار ءتۇرلى اۋرۋى بار ايەلدەرگە كومەك كورسەتۋگە ماماندانعان جەتەكشى مەديسينالىق مەكەمە بولىپ تابىلادى.
ورتالىقتىڭ مىندەتى - ايەلدىڭ دەنساۋلىعىن ساقتاۋ جانە انا بولۋ قاۋىپسىزدىگىە قامتاماسىز ەتۋ، ءسابي ءولىمى مەن بالا مۇگەدەكتىگىن ازايتۋ.
ءبىر كۇندىك كلينيكا 2022 جىلى قۇرىلعان ۇرىقتى قورعاۋ ورتالىعى بازاسىندا اشىلىپ، تۋا بىتكەن اقاۋدى پرەناتالدىق دياگنوستيكالاۋ بويىنشا قىزمەت كورسەتە باستادى.
«ءبىز پاسيەنتتەرىمىزگە بولاشاق بالانىڭ دەنساۋلىعىنا قاتىستى ەڭ ءدال جانە ۋاقتىلى دياگنوز قويۋعا تىرىسامىز. ءبىر كۇندىك كلينيكا جۇكتى ايەلدەرگە ءبىر كۇن ىشىندە بارلىق تەكسەرۋدەن وتۋگە مۇمكىندىك بەرەدى. مۇندا «وسىندا جانە ءقازىر» ءپرينسيپى ماڭىزدى ءرول اتقارادى. ەندى ءبىز ەمدەلۋشىلەرگە مەملەكەتتىك تەگىن مەديسينالىق كومەك اياسىندا ەڭ زاماناۋي مەديسينالىق دياگنوستيكا مەن ەمدەۋ ادىستەرىن ۇسىنا الامىز»، - دەپ اتاپ ءوتتى الماتى قالاسى پەريناتولوگيا جانە بالالار كارديوحيرۋرگياسى ورتالىعىنىڭ ديرەكتورى گۇلنار نۇرلانوۆا.