قالادا حالىقارالىق جاستار كۇنىنە ارنالعان «ALMA LOVE» ونكۇندىگى اياقتالدى. الماتى اكىمىنىڭ قولداۋىمەن بيىل فەستيۆال جاڭا فورماتتا ۇيىمداستىرىلدى. بۇل تۋرالى قالالىق جاستار ساياساتى باسقارماسى حابارلادى.
بالۋان شولاق اتىنداعى سپورت سارايىندا وتكەن گراند-فينالعا 5 مىڭنان استام ادام قاتىستى. الماتىلىق جاستار «بىرلىك، تازالىق جانە جاۋاپكەرشىلىك» ۇرانى اياسىندا بىرىكتىردى. فەستيۆال جاستاردىڭ ازاماتتىق ۇستانىمى مەن ورتاق قۇندىلىقتارعا بەرىكتىگىن كورسەتتى.
ون كۇن ىشىندە قالا اۋداندارىندا، اكىمدىكتىڭ جوبالىق كەڭسەسىنىڭ قولداۋىمەن، ەكولوگيالىق چەللەندجدەر، «Jastar Talks» شابىت بەرەتىن كەزدەسۋلەر، كۆەستتەر، بي سايىستارى، الەۋمەتتىك جوبالار كورمەسى جانە جايدارمان ويىندارى ءوتتى. ءىس-شارالار 30 مىڭنان استام ادامدى قامتىدى.
«بيىلعى ALMA LOVE ونكۇندىگى جاستاردىڭ الەۋەتىن اشۋعا جانە شىعارماشىلىق يدەيالارىن ىسكە اسىرۋعا باعىتتالعان ەرەكشە جوبا. 10 كۇن بويى الماتىلىق جاستار ءتۇرلى ءىس-شارالارعا قاتىستى. ءبىر فەستيۆال اياسىندا مۇنداي اۋقىمدى جوبا العاش رەت قولعا الىندى. جاستار الماتىنىڭ دامۋى مەن جاڭارۋىنا سەرپىن بەرەتىن كۇش. ءبىز ولاردىڭ باستامالارىن ءاردايىم قولدايمىز»، – دەدى الماتى قالاسى اكىمىنىڭ ورىنباسارى ازامات قالدىبەكوۆ.
گراند-فينالدا قالا دامۋىنا ۇلەس قوسقان جاس كوشباسشىلار مەن ەرىكتىلەرگە الماتى اكىمى اتىنان العىس حاتتار تابىستالدى.
«فەستيۆال جوعارى دەڭگەيدە ءوتتى. بۇل اۋقىمدى شارانىڭ ءبىر بولىگى بولعانىما قۋانىشتىمىن. قولداۋ بىلدىرگەندەردىڭ بارىنە العىس ايتامىن. الماتىنى بىرگە تازا ۇستايىق»، – دەدى «ۆيرۋس جوباسى» ەكولوگيالىق باستاماسىنىڭ جەتەكشىسى، ەرىكتى دۋلات نابييەۆ.
گالا-كونسەرتتە قازاقستاندىق ەسترادا جۇلدىزدارى Dosekesh، نۇربولات قاناي، ەركەش حاسەن، Yenlik ونەر كورسەتتى. ال كەشتىڭ حەدلاينەرى – قايرات نۇرتاc.