الماتى قالاسىنداعى №7 قالالىق كلينيكالىق اۋرۋحانادا العاش رەت AVEIR™ VR سىمسىز كارديوستيمۋلياتورىن يمپلانتاسيالاۋ بويىنشا بىرەگەي وتا جاسالدى. قازاق اريتمولوگتار قوعامىنىڭ پرەزيدەنتى، استانا قالاسى ءپىب مەديسينالىق ورتالىعى اۋرۋحاناسىنىڭ دارىگەرى، پروفەسسور ايان ابدراحمانوۆتىڭ قاتىسۋىمەن وتكەن شەبەرلىك ساعاتىندا بىرنەشە ءساتتى وتا جاسالدى. الماتى قالاسىنىڭ №7 قكا-دا AVEIR™ VR يمپلانتاسياسى العاش رەت قولدانىلدى. بۇعان دەيىن مۇنداي جەدەل ارالاسۋلار استانانىڭ بىرنەشە مامانداندىرىلعان مەديسينالىق ۇيىمدارىندا عانا جۇرگىزىلگەن.
جۇرەك ىرعاعىنىڭ بۇزىلۋى جانە ايقىن جۇرەك قاقپاقشالارىنىڭ پاتولوگيالارىن ەمدەۋدە AVEIR™ VR يمپلانتاسيالاۋ ءادىسى جۇرەك-قان تامىرلارى جۇيەسىنىڭ اۋىر دەرتتەرىمەن سىرقاتتانعان پاسيەنتتەرگە زاماناۋي يننوۆاسيالىق شەشىم رەتىندە قاراستىرىلۋدا. كلينيكادا مامانداردىڭ بىلىكتىلىگىن ارتتىرۋ جۇيەلى تۇردە جۇرگىزىلىپ، ۇزدىك كلينيكالاردىڭ جەتەكشى ماماندارىمەن شەبەرلىك ساعاتتارى ءجيى وتكىزىلەدى. وسى شەبەرلىك ساعاتتىڭ ارقاسىندا جۇرەك-قان تامىرلارى اۋرۋلارىمەن اۋىراتىن پاسيەنتتەردىڭ ءومىر ءسۇرۋ ساپاسىن جاقسارتۋعا باعىتتالعان جاڭا تەحنولوگيا ەنگىزىلدى.
شەبەرلىك ساعات اياسىندا №7 قالالىق كلينيكالىق اۋرۋحانانىڭ ينتەرۆەنسيالىق اريتمولوگتارى، حيرۋرگتەرى، كارديولوگتارى جانە انەستەزيولوگ-رەانيماتولوگتارى ايان ابدراحمانوۆپەن بىرگە ءۇش بىرەگەي وتا جاسادى. پاسيەنتتەردىڭ ءبىرى 70 جاستاعى ازامات، ونىڭ جۇرەك-قان تامىرلارى اۋرۋلارى، جوعارى قان قىسىمى، جۇرەكتىڭ يشەميالىق اۋرۋى، سونداي-اق بىرنەشە كۇردەلى وتالار جاسالعان جاعدايى بولدى. ناۋقاس جۇرەك سوعۋ جيىلىگىنىڭ مينۋتىنا 10 سوققىعا دەيىن تومەندەۋى سالدارىنان ەسىنەن تانىپ، جەدەل جاردەم بريگاداسىمەن اۋرۋحاناعا جەتكىزىلگەن. قاجەتتى تەكسەرۋلەردەن كەيىن، وعان ەلەكترودى جوق ەلەكتروكارديوستيمۋلياتوردى يمپلانتاسيالاۋ ۇسىنىلدى.
№7 قكا ينتەرۆەنسيالىق حيرۋرگيا جانە اريتمولوگيا بولىمشەسىنىڭ دارىگەرى قانات ەرگەشوۆ AVEIR™ VR كارديوستيمۋلياتورىن يمپلانتاسيالاۋ كۇردەلى اريتميا جاعدايلارىن ەمدەۋدە جاڭا مۇمكىندىكتەر اشاتىنىن اتاپ ءوتتى. ونىڭ ايتۋىنشا، بۇل قۇرىلعىنىڭ ارتىقشىلىعى – وپەراسيانىڭ تىلىكسىز جانە جالپى انەستەزياسىز جۇرگىزىلۋى، اسقىنۋ ءقاۋپىنىڭ تومەندىگى جانە پاسيەنتتىڭ قىسقا ۋاقىتتا وڭالۋى.
AVEIR™ VR قۇرىلعىسىنىڭ باسقا دا ەرەكشەلىكتەرىنە شاعىن ولشەمدەرى، 20 جىلعا دەيىن ۇزارتىلعان باتارەيا قىزمەتى، جۇرەك قىزمەتىن قاشىقتان باقىلاۋ، تەمپەراتۋرالىق نەگىزدە جيىلىكتى بەيىمدەۋ، مرت-گە توزىمدىلىگى جانە از ءينۆازيۆتى يمپلانتاسيا جاتادى. بۇل تەحنولوگيا، اسىرەسە، بالالارعا جانە ءداستۇرلى ادىستەر قولجەتىمسىز پاسيەنتتەرگە ەرەكشە ءتيىمدى.
بارلىق ءۇش وتا جوسپارعا ساي ءساتتى ءوتتى، شىعىندار الەۋمەتتىك مەديسينالىق ساقتاندىرۋ قورى ەسەبىنەن قارجىلاندىرىلدى. پاسيەنتتەر اۋرۋحانادان شىعارىلىپ، امبۋلاتوريالىق باقىلاۋدا بولادى.