ق ر پرەمەر-مينيسترى ولجاس بەكتەنوۆ جۇمىس ساپارىمەن قوستاناي وبلىسىنا باردى. نەگىزگى مىندەت – مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى حالقىققا جولداۋىندا بەرىلگەن تاپسىرمالارىنىڭ ىسكە اسىرىلۋ بارىسىن باقىلاۋ، دەپ حابارلايدى aqshamnews.kz
اگروونەركاسىپ كەشەنىندەگى ءبىرقاتار كاسىپورىننىڭ جۇمىسىن كورگەن پرەمەر-مينيستر وڭىردەگى اۋىل شارۋاشىلىعىنىڭ دامۋى، تەرەڭدەتە قايتا وڭدەۋمەن جانە وتاندىق تاۋار وندىرۋشىلەردى قولداۋ شارالارىنىڭ ناتيجەلەرىمەن تانىستى.
بيىل وڭىردە اۋىل شارۋاشىلىعى سالاسىن دامىتۋعا شامامەن 175 ملرد تەڭگە قارجى باعىتتالدى، بۇل وتكەن جىلعى كورسەتكىشتەن 1،7 ەسە اسىپ ءتۇستى. قوستاناي وبلىسى اكىمىنىڭ ورىنباسارى ارمان ابەنوۆ 2027 جىلعا دەيىن اوك-تە 2 مىڭنان استام جۇمىس ورنىن اشاتىن 96 ينۆەستيسيالىق جوبانى ىسكە اسىرۋ جوسپارلانىپ وتىرعانىن باياندادى. ينۆەستيسيانىڭ جالپى كولەمى 232 ملرد تەڭگەنى قۇرايدى. سونىمەن قاتار مال شارۋاشىلىعىن دامىتۋ ماقساتىندا 6 ءتاۋارلى-سۇت فەرماسىن سالۋ جۇمىستارى جۇرگىزىلۋدە، ونىڭ بىرەۋى پايدالانۋعا بەرىلدى. قۇس شارۋاشىلىعىندا جالپى قۇنى 60 ملرد تەڭگەنى قۇرايتىن 2 ءىرى قۇس فابريكاسىن ىسكە قوسۋ جوسپارلانعان، ناتيجەسىندە قۇس ەتىن ءوندىرۋ جىلىنا 62،5 مىڭ تونناعا ارتادى دەپ كۇتىلۋدە.
پرەمەر-مينيسترگە «ارۋانا-2010» ج ش س ۇن ءوندىرۋ كاسىپورنى اۋماعىندا ىشكى جانە سىرتقى نارىققا جەتكىزۋ كولەمىن ۇلعايتۋعا باعىتتالعان قۇنى 3 ملرد تەڭگە بولاتىن ديىرمەن كەشەنىن سالۋ جونىندەگى جوبا تانىستىرىلدى. بۇگىندە كاسىپورىن جىلىنا 90 مىڭ تونناعا دەيىن ءونىم شىعارۋدى قامتاماسىز ەتەدى. كەشەندى كەڭەيتۋ ۇن ءوندىرىسى كولەمىن 2 ەسەگە جۋىق – 170 مىڭ تونناعا دەيىن ارتتىرۋعا مۇمكىندىك بەرەدى. قوسىمشا 150-دەن استام جاڭا جۇمىس ورنى اشىلادى.
ولجاس بەكتەنوۆ مەملەكەت باسشىسىنىڭ بۇل كورسەتكىشتى 70%-عا جەتكىزۋ جونىندەگى تاپسىرماسىنا سايكەس، باسەكەگە قابىلەتتى اۋىل شارۋاشىلىعى ونىمدەرىن شىعارۋدى ۇلعايتۋ جانە وڭدەۋدى تەرەڭدەتۋ جۇمىستارىنىڭ قارقىنىن ارتتىرۋ قاجەتتىگىن باسا ايتتى. بۇگىنگى تاڭدا قازاقستان الەمدەگى بيداي مەن ۇن بويىنشا ەڭ ءىرى ەكسپورتتاۋشى 10 ەلدىڭ قاتارىنا كىرەدى. وبلىس اكىمدىگىنە «ارۋانا-2010» كاسىپورنىنا دايىن ءونىمدى وتكىزۋ نارىقتارىنىڭ گەوگرافياسىن ۇلعايتۋعا كومەكتەسۋ، سونداي-اق ەكسپورتتىق باعىتتاردى كەڭەيتە وتىرىپ، لوگيستيكانى جەتىلدىرۋ ماسەلەسىن پىسىقتاۋ تاپسىرىلدى.
تاماق ونەركاسىبى كاسىپورىندارىن ارالاعان پرەمەر-مينيستر وتاندىق تاۋار وندىرۋشىلەردى مەملەكەتتىك قولداۋ شارالارىنىڭ ىسكە اسىرىلۋ بارىسىمەن تانىستى.
پرەمەر-مينيسترگە كونديتەرلىك ونىمدەردىڭ ءىرى وندىرۋشىلەرىنىڭ ءبىرى – «بايان سۇلۋ» اق-نى جاڭعىرتۋ جوسپارى تۋرالى باياندالدى. بۇگىندە زاۋىت جىلىنا 85 مىڭ تونناعا دەيىن ءونىم شىعارادى. ونىڭ قاتارىندا ۆافلي، زەفير، مارمەلاد، يريس، كارامەل سياقتى 300-دەن استام ءونىم ءتۇرى بار. جالپى قۇنى 14 ملرد تەڭگەدەن اساتىن جاڭا «كونديتەرلىك استانا» كەشەنى جىلىنا قوسىمشا 13 مىڭ توننا ءونىم وندىرۋگە جانە 260 جاڭا جۇمىس ورنى اشۋعا مۇمكىندىك بەرەدى.
ولجاس بەكتەنوۆ وتاندىق برەندتەردى شەتەلدە، ونىڭ ىشىندە سيفرلىق شەشىمدەر ارقىلى ىلگەرىلەتۋدى كۇشەيتۋ قاجەتتىگىن اتاپ ءوتتى. قازىرگى تاڭدا «بايان سۇلۋ» ونىمدەرى شەتەلدىك تمد مەن ەۋروپا نارىقتارىنا ەكسپورتتالادى.
«ميلح» ج ش س ءسۇت زاۋىتىن ارالاۋ بارىسىندا پرەمەر-مينيستر ءوندىرىستىڭ تەحنولوگيالىق ەرەكشەلىكتەرىمەن تانىستى. كاسىپورىن جىلىنا 60 مىڭ تونناعا دەيىن دايىن ءونىم شىعارادى. قۇنى 7،2 ملرد تەڭگەنى قۇرايتىن جانە قۋاتى 10 مىڭ تونناعا دەيىن جەتەتىن ىرىمشىك وندىرەتىن جاڭا سەحتىڭ ىسكە قوسىلۋى الەمدىك ىرىمشىك برەندتەرى ساپاسىنا سايكەس كەلەتىن 20-عا دەيىن ءونىم ءتۇرىن شىعارۋعا مۇمكىندىك بەرەدى.
ولجاس بەكتەنوۆ پرەزيدەنتتىڭ تاپسىرماسىنا سايكەس، ۇكىمەت اۋىل شارۋاشىلىعى سەكتورىن قولداۋ جونىندەگى، ونىڭ ىشىندە شارۋالارعا نەسيە بەرۋ مەن سۋبسيديالاۋ باعىتىنداعى جاڭا جوبالاردى قارجىلاندىرۋ ارقىلى كەشەندى شارالاردى ىسكە اسىرىپ جاتقانىن اتاپ ءوتتى.
«اگروماشحولدينگ KZ» كاسىپورنى بازاسىندا پرەمەر-مينيسترگە وڭدەۋ ونەركاسىبىندە لوكاليزاسيالاۋدى تەرەڭدەتۋ جۇمىستتارىنىڭ ناتيجەسى كورسەتىلدى. قازاقستانداعى ەڭ ءىرى اۋىل شارۋاشىلىعى تەحنيكاسىن ءوندىرۋشى كاسىپورىن جىلىنا 1 مىڭعا دەيىن كومباين، 3 مىڭ تراكتور، 300 تۇقىم سەپكىش جانە 200 جيناۋشى پلاتفورما شىعارادى. كومپانيا CLAAS، گومسەلماش، سانكت-پەتەربۋرگ تراكتور زاۋىتى، Lovol، AMAZONE سياقتى الەمدىك جەتەكشى وندىرۋشىلەرمەن، سونداي-اق قازاقستاندىق ماشينا جاساۋ زاۋىتتارىمەن ىنتىماقتاسادى.
ولجاس بەكتەنوۆ كاسىپورىندى ارالاۋ بارىسىندا وتاندىق تاۋار ءوندىرۋشىنى قولداۋ ماقساتىندا اۋىل شارۋاشىلىعى تەحنيكاسى ءوندىرىسىن لوكاليزاسيالاۋدى ارتتىرۋ قاجەتتىگىنە ايرىقشا نازار اۋداردى. بۇل اگروونەركاسىپتىك پاركتى جاڭارتۋ ءۇشىن قاجەت.
«ۇكىمەت وڭدەۋ ونەركاسىبىندە لوكاليزاسيانى تەرەڭدەتۋگە ەرەكشە كوڭىل ءبولىپ، باستى مىندەتى وتاندىق تاۋار وندىرۋشىلەردى قولداۋ سانالاتىن ەكونوميكالىق پاتريوتيزم قاعيداتىن بەرىك ۇستانادى. وسى ماقساتتا ۇكىمەت اۋىل شارۋاشىلىعى تەحنيكاسىن سۋبسيديالاۋ قاعيدالارىنا ءتيىستى وزگەرىستەر ەنگىزدى. وسىلايشا، وتاندىق ءوندىرىس قۇرال-جابدىقتارىن ساتىپ الۋ كەزىندە سىياقى مولشەرلەمەسى 6%-عا دەيىن سۋبسيديالانادى. بۇل رەتتە قازاقستاندا وندىرىلەتىن تەحنيكانىڭ يمپورتتىق انالوگتارىن سۋبسيديالاۋ مۇمكىندىگى الىنىپ تاستالدى. سونىمەن قاتار وتاندىق اۋىل شارۋاشىلىعى ماشينا جاساۋ كاسىپورىندارىنىڭ ءوندىرىس كولەمىن ۇلعايتىپ قانا قويماي، وزىق ازىرلەمەلەر مەن نارىق سۇرانىستارىنا سايكەس، ساپانى جاقسارتا وتىرىپ، تەحنيكالىق جابدىقتاردى جاڭعىرتۋ ۇدەرىستەرىن جالعاستىرۋى قاجەت»، – دەپ اتاپ ءوتتى ولجاس بەكتەنوۆ.
2024 جىلى باستالعان جەڭىلدىكتى ليزينگ باعدارلاماسىنا ۇكىمەت 100 ملرد تەڭگەدەن استام قارجى ءبولدى. ءبىر جىل ىشىندە شارۋالار 22 مىڭ دانا زاماناۋي تەحنيكا ساتىپ الدى، بۇل اگروونەركاسىپ پاركىن جاڭارتۋدىڭ 5،5%-ىن قۇرادى.