كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا جۇڭگو حالىق رەسپۋبليكاسىنىڭ ينتەرۆەنسيالىق كارديولوگيا سالاسىنداعى تانىمال الەمدىك ساراپشىلارى – سىچۋان ۋنيۆەرسيتەتىنىڭ باتىس جۇڭگو اۋرۋحاناسىنىڭ كارديولوگيا ءبولىمىنىڭ ديرەكتورى پروفەسسور ماو چەننىڭ جانە اۋرۋحانانىڭ باس دارىگەرى، تۋا بىتكەن جۇرەك اقاۋلارىن ينتەرۆەنسيالىق ەمدەۋ جونىندەگى جەتەكشىسى يۋان فەننىڭ قاتىسۋىمەن قولقا ستەنوزىن ەمدەۋدىڭ وزىق از ءينۆازيۆتى تەحنولوگياسى – قولقا قاقپاقپاشاسىن ترانسكاتەتەرلىك يمپلانتاسيالاۋ (TAVI) بويىنشا شەبەرلىك ساباعى ءوتتى.
TAVI – اۋىر قولقا ستەنوزى جانە جوعارى وپەراسيالىق ءقاۋپى بار ناۋقاستار ءۇشىن اشىق جۇرەك وپەراسياسىنا زاماناۋي بالاما. بۇل ءادىس بيولوگيالىق كلاپاندى كەۋدە قۋىسىن اشپاي-اق فەمورالدى ارتەريا ارقىلى جەتكىزۋگە مۇمكىندىك بەرەدى، اۋرۋحاناعا جاتقىزۋ ۋاقىتىن قىسقارتادى جانە اسقىنۋلاردىڭ سانىن ازايتادى.
شەبەرلىك ساباعى اياسىندا قازاقستاندا العاش رەت جەتەكشى جۇڭگو ءوندىرۋشىسىنىڭ سوڭعى بۋىن يننوۆاسيالىق ءوزى اشىلاتىن كلاپاننىڭ العاشقى يمپلانتاسياسى جاسالدى. كارديولوگيا جانە ىشكى اۋرۋلار عزي رەنتگەنوپەربلوك مەڭگەرۋشىسى الەكسەي كولەسنيكوۆتىڭ ايتۋىنشا، بۇل جۇيە بىرەگەي كلينيكالىق مۇمكىندىكتەردى ۇسىنادى: جوعارى ساپالى پەريكارديالدى تىننەن جاسالعان وزدىگىنەن اشىلاتىن كلاپان پاسيەنتتىڭ اناتوميالىق ەرەكشەلىكتەرىنە وڭاي بەيىمدەلەدى، ال ونى قايتا ورنالاستىرۋ جانە الۋ مۇمكىندىگى ورناتۋدىڭ دالدىگىن قامتاماسىز ەتەدى جانە تاۋەكەلدەردى ازايتادى. تەحنولوگيا جوعارى گەموديناميكالىق تيىمدىلىكپەن سيپاتتالادى.
ەكى كۇن ىشىندە 7 ناۋقاسقا وپەراسيا جاسالدى. ءبىر مىسال رەتىندە اتاپ وتەيىك: 74 جاستاعى ناۋقاستا كلينيكاعا تۇسكەن كەزدە باس اينالۋ، باس اۋرۋى، اياعى توڭۋ، جالپى السىزدىك، فيزيكالىق كۇش تۇسكەندە، 100-150 مەتر قاشىقتىقتا جۇرسە ەنتىگۋ سياقتى شاعىمدارى بولدى. نەگىزگى دياگنوزى: جۇرە پايدا بولعان جۇرەك اقاۋى، قولقا قاقپاقشاسىنىڭ ايقىن ستەنوزى، سوزىلمالى جۇرەك قىزمەتىنىڭ جەتكىلىكسىزدىگى. قوسىمشا دياگنوزى: جۇرەكتىڭ يشەميالىق اۋرۋى، ارتەريالىق گيپەرتونيا، 2 ءتيپتى قانت ديابەتى. وپەراسيادان كەيىن ناۋقاس ءوزىن وتە جاقسى سەزىنەدى. جالپى، بارلىق وپەراسيالار ءساتتى ءوتتى.
«بۇل شەبەرلىك كلاسى قازاقستاندا ەمدەۋدىڭ الەمدىك ستاندارتتارىن ەنگىزۋگە، وتاندىق مامانداردىڭ قۇزىرەتتەرىن كەڭەيتۋگە جانە جۇرەك اۋرۋلارى بار ناۋقاستارعا كومەك كورسەتۋدىڭ وزىق ادىستەرىنىڭ قولجەتىمدىلىگىن ارتتىرۋعا ىقپال ەتە وتىرىپ، جوعارى تەحنولوگيالىق كارديوحيرۋرگيانى دامىتۋداعى ماڭىزدى كەزەڭ بولدى»، – دەيدى ينستيتۋتتىڭ باسقارما ءتوراعاسى مارات پاشيموۆ.