الماتى قالاسىندا كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا العاش رەت MitraClip جۇيەسىنىڭ كومەگىمەن ميترالدى كلاپاندى ەندوۆاسكۋليارلىق كليپتەۋ بويىنشا ءمينيينۆازيۆتى رەنتگەن وپەراسياسى جاسالدى.
وپەراسيانى سيۋريحتەن كەلگەن (شۆەيساريا) پروفەسسور ماۋريسيو تاراماسسونىڭ جەتەكشىلىگىمەن جانە ۇلتتىق عىلىمي كارديوحيرۋرگيا ورتالىعىنىڭ (استانا) ينتەرۆەنسيالىق كارديولوگى، م.ع.د. مارات ارىپوۆپەن بىرلەسىپ جۇرگىزىلدى.
72 جاستاعى ناۋقاس ۇزاق جىلدار بويى 200/100 مم سىن.باع. دەيىنگى جوعارى قان قىسىمىنان، ميترالدىق جەتكىلىكسىزدىكتەن جانە جۇرەكشە فيبريللياسياسىنان زارداپ شەككەن. سونىمەن قاتار، ەكى جىل بۇرىن ميوكارد ينفاركتىسىن وتكەرگەن. ونىڭ جاعدايى دەمىكپەنىڭ ءورشۋى، جۇرەك قاعۋىنىڭ جيىلەۋى، قۇلاقتىڭ شۋىلداۋى، جالپى السىزدىك جانە تەز شارشاۋ بەلگىلەرىمەن ناشارلاپ، ەمدەۋگە جاتقىزىلدى. كونسيليۋم وتكىزىلىپ، جۇرەك ىرعاعىن رەتتەۋ جانە ميترالدى كلاپاندى كليپتەۋ جولىمەن تۇزەتۋ ءۇشىن وكپە تامىرلارىنىڭ راديوجيىلىك ابلياسياسىن جاساۋ ۇسىنىلدى.
ميترالدىق جەتكىلىكسىزدىكتى ەمدەۋدىڭ نەگىزگى ءادىسى – كلاپان پلاستيكاسى نەمەسە تولىق اۋىستىرۋ وپەراسياسى. الايدا ناۋقاستىڭ قوسىمشا اۋرۋلارى مەن جاعدايىنىڭ اۋىرلىعى حيرۋرگيالىق وپەراسيانىڭ قاۋىپتىلىگىن ارتتىردى.
MitraClip – بۇل ميترالدى كلاپاندى قالپىنا كەلتىرۋدىڭ از ءينۆازيۆتى ءادىسى. بۇل يننوۆاسيالىق قۇرىلعى ميترالدى كلاپاندى كليپتەپ، قاننىڭ كەرى اعۋىن (رەگۋرگيتاسيا) ازايتۋعا مۇمكىندىك بەرەدى. بۇل ءادىس اشىق جۇرەك وپەراسياسىن كوتەرە المايتىن ناۋقاستار ءۇشىن جالعىز مۇمكىندىك بولىپ تابىلادى. وپەراسيا ناركوز ارقىلى جاسالىپ، ينتەرۆەنسيالىق حيرۋرگتەر سان تامىرلارى ارقىلى كاتەتەر كومەگىمەن رەنتگەن جانە ۋلترادىبىستىق باقىلاۋدا ميترالدى كلاپانعا جەتەدى. قۇرىلعى كلاپانعا بەكىتىلىپ، ونى قىسىپ، قان اعىسىن قالىپقا كەلتىرەدى.
«ءبىز جاڭا تەحنولوگيالاردى ەنگىزىپ، زاماناۋي مەديسينالىق ۇردىستەر مەن ستاندارتتاردى ۇستانۋعا تىرىسامىز. ءبىزدىڭ دارىگەرلەر بريۋسسەلدە (بەلگيا) ورنالاسقان Abbott كومپانياسىنىڭ ترەنينگتىك ورتالىعىندا تاعىلىمدامادان ءوتتى. ينستيتۋتتىڭ جانە ۇلتتىق عىلىمي كارديوحيرۋرگيا ورتالىعىنىڭ ينتەرۆەنسيالىق كارديولوگتارى مەن ۋدز دارىگەرلەرىنىڭ جوعارى كاسىبيلىگىن اتاپ وتكەن ءجون. وپەراسيانىڭ ءساتتى ءوتۋى دارىگەرلەر كومانداسىنىڭ ۇيلەسىمدى جۇمىسىنا بايلانىستى»، – دەپ اتاپ ءوتتى ينستيتۋتتىڭ باسقارما ءتوراعاسى مارات پاشيموۆ.
فۋنكسيونالدىق جانە ۋلترادىبىستىق دياگنوستيكا بولىمشەسىنىڭ مەڭگەرۋشىسى اقجان قونىسبەكوۆانىڭ ايتۋىنشا، بۇل وپەراسيا ەحوكارديوگرافيانىڭ تولىق باقىلاۋىمەن جاسالادى. ەمحانانىڭ زاماناۋي 3D ەحوكارديوگرافيا اپپاراتى ارقىلى كليپتى ناقتى ورناتۋ ورنى انىقتالىپ، ينتراوپەراسيالىق باقىلاۋ جۇرگىزىلەدى.
«بۇل از ءينۆازيۆتى پروسەدۋرا ناۋقاستىڭ قالپىنا كەلۋ ۋاقىتىن قىسقارتادى، ال جاعدايىنىڭ جاقسارۋى ناركوزدان شىققاننان كەيىن بىردەن بايقالادى. مۇنداي وپەراسيالاردان كەيىن ناۋقاستار تەز ساۋىعىپ، بىرنەشە كۇننەن كەيىن ۇيگە شىعارىلادى. ولار ءۇشىن ءومىر ءسۇرۋ ساپاسى ايتارلىقتاي جاقسارىپ، دەمىكپە ازايادى، فيزيكالىق بەلسەندىلىك ارتىپ، مەديسينالىق كومەككە جۇگىنۋ جيىلىگى تومەندەيدى»، – دەپ ءتۇسىندىردى رەنتگەنەندوۆاسكۋليارلىق وپەربلوك مەڭگەرۋشىسى الەكسەي كولەسنيكوۆ.
ايتا كەتەرلىك جايت، MitraClip قۇرىلعىسى 2020 جىلى ۇزدىك مەديسينالىق تەحنولوگيا ءۇشىن Prix Galien USA سىيلىعىن (نوبەل سىيلىعىنا تەڭ) جەڭىپ العان.