الماتى قالاسىنىڭ اكىمدىگىندە پاراليمپيادا ويىندارىنا قاتىسقان كاميليا دوسمالوۆاعا قۇرمەت كورسەتىلدى.
كاميليا دوسمالوۆا — پارا-تاەكۆوندودان حالىقارالىق دارەجەدەگى سپورت شەبەرى، ول پاريجدە وتكەن XVII جازعى پاراليمپيادا ويىندارىندا بەسىنشى ورىنعا يە بولدى. الماتى اكىمىنىڭ ورىنباسارى بەيبىت شاحانوۆ سپورتشى مەن ونىڭ جەكە جاتتىقتىرۋشىسى ءانۋار ۇسەنوۆتى قۇتتىقتاپ، ولاردىڭ ەرىك-جىگەرى مەن تاباندىلىعى بارشاعا ۇلگى ەكەنىن اتاپ ءوتتى.
كەزدەسۋ بارىسىندا بەيبىت شاحانوۆ پرەمەر-مينيستر ولجاس بەكتەنوۆتىڭ اتىنان كاميليا دوسمالوۆا مەن ونىڭ جاتتىقتىرۋشىسىنا العىس حاتتار تابىس ەتتى.
سونداي-اق، اكىمنىڭ ورىنباسارى كاميليا دوسمالوۆاعا 2 ميلليون تەڭگەلىك اقشالاي سەرتيفيكات، ال ونىڭ جاتتىقتىرۋشىسى ءانۋار ۇسەنوۆكە 1،5 ميلليون تەڭگەلىك سەرتيفيكات سىيلادى. سونىمەن قاتار، سپورتشىعا قىزمەتتىك باسپانا بەرىلدى.
«بارلىق قازاقستاندىقتارعا جانە الماتى اكىمدىگىنە قولداۋ كورسەتكەندەرى ءۇشىن ۇلكەن العىسىمدى بىلدىرەمىن. بۇل قولداۋ مەنىڭ بولاشاق جەتىستىكتەرىمنىڭ نەگىزى بولادى»، — دەدى كاميليا دوسمالوۆا.
ايتا كەتەيىك، وتكەن پاراليمپيادا ويىندارىندا قازاقستان قۇراماسى رەكوردتىق توعىز مەدال جەڭىپ الدى، ونىڭ ىشىندە 2 التىن، 3 كۇمىس جانە 4 قولا مەدال بار.