ارىستانعاني زاپپاروۆ: “جالعان مەملەكەتتىك نومىرلەردى پايدالانۋدىڭ ءاربىر دەرەگى مۇقيات تەكسەرىلەتىن بولادى”
الماتىنىڭ باس پوليسەيى جالعان مەملەكەتتىك نومىرلەردى پايدالانۋدىڭ ءاربىر دەرەگى مۇقيات تەكسەرىلەتىنىن ايتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ “قورعاۋ – ءقاۋىپتى جۇرگىزۋشى” اۆتوماتتاندىرىلعان جۇيەسىنىڭ جۇمىسىمەن تانىستى.
"كۇنىنە 800 مىڭنان استام كولىك جۇرەتىن ءىرى شاھار جاعدايىندا بۇل جۇيە ءوزىنىڭ تيىمدىلىگىن كورسەتتى. ول جالعان نومىرلەردى پايدالاناتىن جۇرگىزۋشىلەردى، جارىس ۇيىمداستىرىپ، اگرەسسيۆتى جۇرگىزۋگە جول بەرگەندەردى انىقتاۋعا، سونداي-اق، ابايسىزدا قايعىلى وقيعاعا اكەلەتىن، جول قوزعالىسى ەرەجەلەرىن ەلەمەيتىن جول قوزعالىسىنا قاتىسۋشىلاردى انىقتاۋعا باعىتتالعان. جالعان ءنومىر، ادەتتە، بەينەباقىلاۋ جۇيەلەرىن “اينالىپ ءوتۋ” ءۇشىن جانە قىلمىس جاساعاندا قولدانىلادى. ءبىزدىڭ مىندەتىمىز – مۇنداي دەرەكتەردىڭ الدىن الۋ جانە وسى سۇمدىق تاجىريبەنى جويۋ. پوليسيانىڭ الدىڭعى شەپتەگى بولىمشەلەرى مەن اقپاراتتىق تەحنولوگيالار مۇنداي قۇقىق بۇزۋشىلىقتاردى انىقتاۋعا بارىنشا جۇمىلدىرىلدى"، – دەدى ارىستانعاني زاپپاروۆ.
الماتى پوليسياسى باسشىسىنىڭ ايتۋىنشا، تەك وسى ايدىڭ باسىنان بەرى قالا جولدارىندا كولىك قۇرالىن جالعان مەملەكەتتىك تىركەۋ نومىرلەرىمەن باسقارۋدىڭ 218 دەرەگى، مەملەكەتتىك تىركەۋ نومىرلىك بەلگىسى جوق كولىك قۇرالىن باسقارۋدىڭ تاعى 773 دەرەگى انىقتالعان. سونىمەن قاتار، وسى ايدىڭ باسىنان بەرى 4 ەگىز كولىك ۇستالدى.
"سونداي-اق، جول قوزعالىسى ەرەجەلەرىن جۇيەلى تۇردە بۇزىپ، ايىپپۇل تولەۋدەن جالتارىپ جۇرگەن كولىكتەردى ۇستاۋ جۇمىستارى جۇرگىزىلۋدە. وسى ماقساتتا ءىرى كولەمدەگى اكىمشىلىك ايىپپۇلدارى بار كولىكتەردىڭ ءتىزىمىن جاسادىق. ماسەلەن، كەشە ي. ەسىمدى ازاماتتىڭ باسقارۋىندا بولعان ۆاز-21114 اۆتوكولىگى ۇستالدى، ونىڭ 2،4 ملن تەڭگەدەن استام تولەنبەگەن ايىپپ ۇلى بار. وسى ايدىڭ باسىنان بەرى جالپى قارىزى 11 ميلليون تەڭگەدەن اساتىن 9 كولىك مامانداندىرىلعان ايىپپۇل تۇراعىنا ورنالاستىرىلدى"، – دەپ تولىقتىردى ارىستانعاني زاپپاروۆ.
“قورعاۋ – ءقاۋىپتى جۇرگىزۋشى” جۇيەسى ەنگىزىلگەننەن بەرى بارلىعى 38 824 قۇقىق بۇزۋشىلىق انىقتالدى، ونىڭ ىشىندە جىلدامدىقتى شەكتەن اسىرعان 33 126 جۇرگىزۋشى، كولىكتى تەحنيكالىق بايقاۋسىز باسقارۋدىڭ 2 349 دەرەگى، 2 322 كولىكتى ساقتاندىرۋ ءپوليسىنسىز جۇرگىزۋ، 83ء-ى بۇرىن كولىك قۇرالدارىن باسقارۋ قۇقىعىنان ايىرىلعان جۇرگىزۋشىلەردىڭ رولگە وتىرعان دەرەگى. جۇرگىزىلگەن الدىن الۋ ءىس-شارالارىنىڭ ناتيجەسىندە، 1128 اۆتوكولىك مامانداندىرىلعان ايىپپۇل تۇراعىنا ورنالاستىرىلدى، 485 مەملەكەتتىك تىركەۋ نومىرلىك بەلگىلەرى تاركىلەندى.