«قىزىل وبا» يۋنەسكو-نىڭ تاريحي-مادەني مۇرالار تىزىمىنە ەنۋى مۇمكىن

سولتۇستىك قازاقستان وبلىسىنداعى «قىزىل وبا» بىرەگەي ارحەولوگيا ەسكەرتكىشىنىڭ اۋماعىنان تاس داۋىرىنە تيەسىلى ارتەفاكتىلەر تابىلدى.

ول - جەردەگى بوگەتتەر مەن ارىقتار تۇرىندەگى ەجەلگى يرريگاسيانىڭ ىزدەرى. سونداي-اق، وننان استام قورىم اشىلدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

«ەڭ نەگىزگى قورىمدا قازبا جۇمىستارىن جۇرگىزگەن كەزدە، تابىتپەن كومىلگەن مازارلار انىقتالدى. بارلىعى داستۇرگە ساي جۇرگىزىلگەن. ياعني، ادام باسقا جەردە قايتىس بولسا، ونى وسى جەرگە اكەلىپ جەرلەگەن دەگەن دە پىكىر بار. سونىمەن قاتار، وسىنداي مازارلاردىڭ بولۋى، جەرلەنگەن ادامداردىڭ جاي ادام ەمەس ەكەندىگىن بىلدىرەدى. سەبەبى، مازار سالۋعا قاراپايىم بايدىڭ، اۋقاتتى ادامنىڭ دا شاماسى كەلمەيتىن. ول كەزدە بەلگىلى ءبىر يەرارحيا بولدى»، - دەيدى تاريحي-مادەني مۇرانى قورعاۋ جانە پايدالانۋ ورتالىعىنىڭ ديرەكتورى راقات مامبەتالينوۆ.

ارحەولوگيالىق قازبا جۇمىستارى كەزىندە تاعى ءبىر جاڭالىق اشىلدى. عالىمدار ورتا عاسىرلىق قالاشىق ورنىنان كەيىنگى ەنەوليت ءداۋىرىنىڭ ارتەفاكتىلەرىنە تاپ بولعان.   

«بۇل – تاس قايراقتار، نۋكلەۋس سىنىقتارى، جەبە ۇشتارى، قىرعىشتار، پلاستينالار، جاڭقالار، قاپسىرمالار، تىستەۋىش قۇرالدار. بۇل زاتتارعا قاراپ، وسىدان 8 مىڭ جىل بۇرىن بۇل جەردى ادامدار مەكەندەگەنىنىن ايتۋعا بولادى. ولار اڭ اۋلاپ، تەرى وڭدەگەن»، - دەيدى ق ر ۇلتتىق مۋزەيىنىڭ عىلىمي قىزمەتكەرى ساۋلە راحىمجانوۆا.

كەلەسى جىلى قازبا جۇمىستارىنا ۇلىبريتانيا ەلىنىڭ ارحەولوگتارى قوسىلادى. ال، وتاندىق عالىمدار تاريحي ەسكەرتكىشتى يۋنەسكو-نىڭ تاريحي-مادەني مۇرالار تىزىمىنە ەنگىزۋ ءۇشىن قۇجاتتار جيناماق.