ارنايى تەحنيكا وتە المايتىن، قولجەتىمسىز ورىنداردى وڭدەۋ ءۇشىن ەكسپەريمەنتالدى تۇردە دروندار قولدانىلا باستادى دەپ حابارلايدى اlmaty-akshamy.kz.
بۇل وڭدەۋ اۋماعىن كەڭەيتۋگە جانە جۇمىستىڭ تيىمدىلىگىن ارتتىرۋعا سەپتىگىن تيگىزەدى. بيولوگيالىق وڭدەۋدىڭ نەگىزگى بولىگى مەحانيكالىق تاسىلمەن اسپالى بۇرىككىشتىڭ كومەگىمەن جۇزەگە اسىرىلادى.
سينوپتيكتەردىڭ بولجامىنا سايكەس، 21-27 ءساۋىر ارالىعىندا جاۋىن-شاشىن كۇتىلۋدە. جاۋىن كەزىندە بيولوگيالىق زاتتاردىڭ بەلسەندىلىگى تومەندەيدى. سوندىقتان جاسىل جەلەكتى بيولوگيالىق وڭدەۋ جۇمىستارى ۋاقىتشا توقتاتىلدى. وڭدەۋگە ق ر اۋماعىندا قولدانۋعا رۇقسات ەتىلگەن قاۋىپتىلىكتىڭ تومەنگى ساناتىنداعى بيولوگيالىق پرەپارات قولدانىلادى. وزىندىك ءيىسى بار، الايدا قورشاعان ورتاعا، ادامدارعا، ءۇي جانۋارلارى مەن وزگە دە ءتىرى اعزالارعا ەش زيانى جوق.
ەسكە سالا كەتسەك، قالادا اعاشتاردى زيانكەستەردەن ساقتاۋ ءۇشىن بيولوگيالىق وڭدەۋ جۇمىستارىنىڭ ءبىرىنشى كەزەڭى باستالدى. تيىمدىلىكتى ارتتىرۋ ءۇشىن جۇمىستار تۇنگى ۋاقىتتا ساع. 23:00 مەن 06:00 ارالىعىندا جۇرگىزىلەدى. اتالعان ۋاقىت مۇنداي جۇمىستار ءۇشىن قولايلى بولىپ سانالادى، سەبەبى كۇن ساۋلەسى دارىلىك زاتتىڭ زيانكەستەرگە اسەرىن تومەندەتەدى.