تاۋلىگىنە 20-عا دەيىن ينفەكسيا جۇقتىرۋ دەرەگى تىركەلۋدە.
سانيتاريالىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ ەلدەگى ەپيداحۋال جايىندا تۇسىنىكتەمە بەردى، دەپ حابارلايدى Almaty-akshamy.kz
ەلىمىزدە COVID-19 بويىنشا ەپيدەميولوگيالىق جاعداي تۇراقتى، تاۋلىگىنە 20-عا دەيىن ينفەكسيا جۇقتىرۋ دەرەگى تىركەلۋدە، بۇل ينفەكسيانىڭ تارالۋ كوەففيسيەنتىنە دە اسەر ەتتى، ءساۋىر ايىنان بەرى بۇل كورسەتكىش 1-دەن تومەن.
ناۋقاستاردىڭ 98%-دان استامى ساۋىعىپ شىقتى. ءساۋىردىڭ وتكەن كەزەڭىندە ناۋرىزدىڭ ۇقساس كەزەڭىمەن سالىستىرعاندا سىرقاتتانۋشىلىق دەڭگەيى 8،3 ەسەگە تومەندەدى (2 345-تەن 280 جاعدايعا دەيىن).
ەپيدەميولوگيالىق جاعدايدى باعالاۋ ماتريساسىنا سايكەس، 2022 جىلعى 3 ناۋرىزدان باستاپ قازاقستان رەسپۋبليكاسى جانە بارلىق وڭىرلەر «جاسىل» ايماقتا. سوڭعى ايدا ستاسيونارلىق ەم الاتىن ناۋقاستار سانى 5،7 ەسەگە (588 – دەن 102-گە دەيىن)، امبۋلاتوريالىق ەم الىپ جاتقان ناۋقاستار 3،4 ەسەگە (5655-تەن 1655-كە دەيىن)، ينفەكسيالىق توسەك ورىندارىنىڭ جۇكتەمەسى 2،0 ەسەگە 8-دەن 4%-عا دەيىن، رەانيماسيالىق توسەكتەر جۇكتەمەسى 3،5 ەسەگە 7-دەن 2%-عا دەيىن تومەندەدى.
بۇگىنگى كۇنى كوروناۆيرۋستىق ينفەكسياعا قارسى ۆاكسينانىڭ ءبىرىنشى كومپونەنتىمەن 10،5 ملن ادام ەگىلدى، بۇل يممۋنداۋعا جاتاتىن كونتينگەنتتىڭ 83،2%-ىن جانە جالپى حالىق سانىنىڭ 55،2%-ىن قۇرايدى.
ەكىنشى كومپونەنتپەن 10،1 ملن ادام ەگىلدى، بۇل ەكپە الۋعا ءتيىستى تۇرعىنداردىڭ 81،0%-ى جانە جالپى حالىق سانىنىڭ 53،1%-ى. ءتيىستى كونتينگەنتتىڭ 90%-دان استامى 5 وڭىردە (شىعىس قازاقستان، جامبىل، تۇركىستان، قىزىلوردا وبلىستارى جانە شىمكەنت قالاسى) ەكپەمەن قامتىلعان.
ريەۆاكسيناسيادان 3،7 ملن ادام نەمەسە ءتيىستى كونتينگەنتتىڭ 59،4% ءوتتى. ددسۇ مالىمەتتەرى بويىنشا، سوڭعى اپتادا اۋرۋ بارلىق ايماقتا 24%-عا تومەندەگەن، الايدا الەمنىڭ 56 ەلىندە اۋرۋدىڭ 2-دەن 300% - عا دەيىن ءوسۋى بايقالادى، ونىڭ ىشىندە باا-دە سوڭعى اپتادا اۋرۋشاڭدىق كورسەتكىشتەرى 2%-عا، ءۇندىستاندا 55%-عا، چەرنوگوريادا 29%-عا، پەرۋدە 26%-عا ءوستى، ەگيپەتتە 115%، قىتايدا 138%، فينليانديادا 300% ارتقان. سونىمەن قاتار قىتايدا وميكروننىڭ Stealth نۇسقاسىنىڭ تارالۋىنا بايلانىستى سىرقاتتانۋشىلىقتىڭ كۇرت ءوسۋى بايقالادى، ناۋرىزدىڭ باستاپقى مەرزىمىمەن سالىستىرعاندا اۋرۋ سيمپتومدارى بار ناۋقاستاردىڭ تاۋلىكتىك سانى 5،0 ەسە، سيمپتومسىز ناۋقاستاردىڭ سانى 1،2 ەسە جوعارىلاعان. قازىرگى ۋاقىتتا تاۋلىگىنە 18 مىڭنان استام جاعداي تىركەلۋدە.
«قۇرمەتتى قازاقستاندىقتار! اۋرۋدان ەڭ سەنىمدى قورعانىش - ۆاكسينالاۋ جانە ۋاقىتىلى جاسالعان ريەۆاكسينالاۋ. ادامدار كوپ جينالاتىن ورىنداردا بەتپەردە كيۋدى جالعاستىرۋعا كەڭەس بەرەمىز، بولمەلەرگە تازا اۋا كىرۋى ءۇشىن تەرەزەلەر مەن ەسىكتەردى اشىپ، ءجيى جەلدەتىپ تۇرۋ قاجەتتىلىگىن ەسكە سالامىز»، - دەدى ەرجان بايتانايەۆ.