الماتىدا اعاشتار قۇلاپ، كولىكتەر زاقىمدالدى

قالالىق قىزمەت اۋلالار مەن قوعامدىق ورىندارداعى قۇلاعان اعاشتاردى تازارتىپ جاتىر.

الماتىدا قاردىڭ كەسىرىنەن قۇلاعان اعاشتار مەن بۇتاقتار 44 كولىكتى زاقىمدادى، دەپ حابارلايدى Almaty-akshamy.kz AstanaTv ارناسىنا سىلتەمە جاساپ.

الماتىدا قالىڭ قار كەسىرىنەن كوپتەگەن اعاش قۇلادى. ولار ءبىر تاۋلىك ىشىندە 44 كولىكتى زاقىمداعان. قالالىق قىزمەت اۋلالار مەن قوعامدىق ورىندارداعى قۇلاعان اعاشتاردى تازارتىپ جاتىر.

سونداي-اق، جولداردا كوكتايعاق بولماس ءۇشىن، الدىن الۋ جۇمىستارى دا جالعاسىپ جاتىر. بۇل جۇمىستارعا مىڭنان استام جۇمىسشى مەن التى ءجۇز بىرلىك تەحنيكا جۇمىلدىرىلعان.

«قازىرگى ۋاقىتتا جولدارعا قۇم سەبۋ جۇمىستارى جالعاسىپ جاتىر. ءبىز كوكتايعاقتىڭ الدىن الۋ جۇمىستارىن تۇراقتى جۇرگىزىپ وتىرامىز. سەبەبى بىزدە اۋا رايى تۇراقسىز، تۇسكەن قار ەرىپ-قاتىپ، كوكتايعاق بولۋ ءقاۋپى جوعارى. سوندىقتان ماماندار اۋا رايىن ساراپتايدى، قارايدى. ءبىرىنشى كەزەكتە جولايرىقتارعا، ەڭىستەرگە، جوعارىعا كوتەرىلەتىن جولدارعا سەبىلەدى. اباتتاندىرۋ قىزمەتى شتاتتىق رەجيمدە جۇمىس ىستەيدى»، - دەدى الماتى قالاسى اكىمدىگىنىڭ تۇرعىن ءۇي ساياساتى باسقارماسى ءبولىمىنىڭ باس مامانى الەكساندر سەرگەيەۆ.