الماتىدا ادامداردىڭ نەسيە تاريحىنىڭ ماسەلەسىن «شەشىپ بەرمەكشى» بولعان كۇدىكتى ۇستالدى

كۇدىكتى ءقازىر ۋاقىتشا ۇستاۋ يزولياتورىندا وتىر. پوليسەيلەر الدانعان ادامدار كوپ ەكەنىنە سەنىمدى.

"جەدەل ىزدەستىرۋ ءىس-شارالارى بارىسىندا كۇدىكتى 30 جاستاعى الماتى وبلىسىنىڭ تۋماسى ۇستالدى"، – دەپ حابارلايدى Almaty-akshamy.kz Polisia.kz-كە سىلتەمە جاساپ. 

قازاقستان رەسپۋبليكاسىنىڭ بۇكىل اۋماعىندا وننان استام جابىرلەنۋشى الاياقتىق تۋرالى ارىزبەن پوليسياعا جۇگىنگەن. ءتارتىپ ساقشىلارىنىڭ اقپاراتىنا سايكەس، ا.ەسىمدى ەر ادام نەسيەلىك تاريحى ناشار ادامدارعا بۇل ماسەلەنى «شەشۋدى» ۇسىنعان. ءوزىنىڭ جۇمىسى ءۇشىن ول قوماقتى قارجى سۇراعان. اڭقاۋ ادامداردىڭ اقشانى تولەپ، كۇتە تۇرۋىنان باسقا امالى جوق. اقشانى العاننان كەيىن ەر ادام بەلگىسىز باعىتتا جاسىرىنعان. قولىنداعى قاراجاتتى ءوز قاجەتتىلىكتەرىنە جۇمساعان. 

«جەدەل ىزدەستىرۋ ءىس-شارالارى بارىسىندا كۇدىكتى 30 جاستاعى الماتى وبلىسىنىڭ تۋماسى ۇستالدى. ءقازىر 10 الاياقتىق فاكتىسى دالەلدەندى. سونىمەن قاتار جابىرلەنۋشىلەر تەك الماتىدان عانا ەمەس، قازاقستاننىڭ باسقا دا قالالارىنان جۇگىندى. سوتقا دەيىنگى تەرگەۋدىڭ ءبىرىڭعاي تىزىلىمىندە 190-باپ بويىنشا قىلمىستىق ءىس قوزعالدى»، – دەدى المالى اپب-نىڭ باستىعى ەسەن ىسقاقوۆ. 

 «ۇستالعان ادامنىڭ سۋرەتىنە مۇقيات قاراۋىڭىزدى سۇرايمىز. وسى ەر ادامنىڭ ارەكەتىنەن زارداپ شەككەن ادامداردىڭ مىنا تەلەفوندارعا حابارلاسۋلارىن سۇرايمىز: 8-708-707-9202؛ 8-705-771-1371؛ 8-705-555-7763»، – دەدى ەسەن ىسقاقوۆ.