بيزنەستى قورعاۋ جانە زاڭسىز ارالاسۋعا جەدەل دەن قويۋ ماقساتىندا ارنايى ءموبيلدى توپ قۇرىلدى
شىمكەنتتە ءۇش جىل ىشىندە شاعىن جانە ورتا بيزنەس سۋبەكتىلەرىنىڭ قىزمەتىنە لاۋازىمدى تۇلعالاردىڭ زاڭسىز ارالاسۋىنىڭ 21 فاكتىسى انىقتالىپ، 20 لاۋازىمدى تۇلعا سوتتالعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتى باسشىسىنىڭ ءبىرىنشى ورىنباسارى جاندوس جۇمابايەۆ كاسىپكەرلەرمەن كەزدەسۋىندە ايتتى.
سونداي-اق، شىمكەنت قالاسىنىڭ سىبايلاس جەمقورلىققا قارسى قىزمەتى كاسىپكەرلەر پالاتاسىمەن بىرلەسىپ بيزنەستى قورعاۋ جانە زاڭسىز ارالاسۋعا جەدەل دەن قويۋ ماقساتىندا ارنايى ءموبيلدى توپ قۇردى. توپتىڭ قۇرامىنا قالا اكىمىنىڭ ورىنباسارى، اۋدان اكىمدەرى، انتيكور قىزمەتكەرلەرى، كاسىپكەرلەر پالاتاسى، تابيعي مونوپوليالاردى رەتتەۋ جانە باسەكەلەستىكتى قورعاۋ دەپارتامەنتتەرىنىڭ وكىلدەرى، كاسىپكەرلەر قاۋىمداستىعى، زاڭ كەڭەسشىلەرى مەن قوعام بەلسەندىلەرى ەنىپ وتىر.
ءموبيلدى توپ تەگىن اقپاراتتىق-كونسۋلتاسيالىق قولداۋ كورسەتەدى، وتىنىشتەر مەن شاعىمداردى، ۇسىنىستار قابىلدايدى، كاسىپكەرلىك قىزمەتكە كەدەرگى كەلتىرگەن جاعدايلار تۋرالى تەلەفون حابارلامالارىنا شۇعىل جاۋاپ بەرەدى.