سوتقا دەيىنگى تەرگەۋ باستالدى.
الماتىدا كولىك ۇرىسى ادام ولىمىنە اكەپ سوققان اپاتتى جاسادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
پد انىقتاۋ باسقارماسىنىڭ حابارلاۋىنشا، بۇرىن بىرنەشە رەت سوتتالعان 22 جاستاعى ر. ەسىمدى ازامات "اقساي" ىقشاماۋدانىنداعى ۇيلەردىڭ ءبىرىنىڭ اۋلاسىنان Mazda كولىگىن ۇرلاپ كەتكەن، سودان كەيىن تاعى بىرنەشە قىلمىس جاساعان.
«دالىرەك ايتساق، الاتاۋ اۋدانىنداعى تۇرعىن الابىندا قاسكوي تۇنگى ۋاقىتتا ءۇش كولىكتىڭ اككۋمۋلياتورلارىن ۇرلاپ كەتكەن. ال تاڭعى التىدا ول ادام ولىمىنە اكەپ سوققان اپاتقا ۇشىرادى. كولىك ۇرىسى ساينا كوشەسىمەن سولتۇستىك باعىتتا كەلە جاتىپ اباي داڭعىلىمەن قيىلىسقاندا Toyota Corolla جانە Kia Rio كولىكتەرىمەن سوقتىعىسقان. سوققى سالدارىنان Kia Rio ينەرسيامەن كەدەرگىگە سوقتى. بۇل كولىكتى 52 جاستاعى ەر ادام باسقارعان. وكىنىشكە وراي، ول العان جاراقاتتارىنان وقيعا ورنىندا كوز جۇمدى»، – دەدى الماتى قالالىق پد انىقتاۋ باسقارماسىنىڭ باستىعى ولجاس ءشارىپوۆ.
كولىك ۇرىسىن پاترۋلدىك پوليسيا قىزمەتكەرلەرى قولعا ءتۇسىردى. بەلگىلى بولعانداي، Mazda كولىگىنىڭ يەسى ءوز كولىك قۇرالىنىڭ ۇرلانعانىن بىلمەگەن: كولىكتىڭ ءوز ءۇيىنىڭ اۋلاسىندا ەكەنىنە سەنىمدى بولعان.
«ادام ولىمىنە اكەپ سوقتىرعان جول-كولىك وقيعاسىنا قاتىستى ق ر قك-نىڭ 345-بابى 3-بولىگىنە (كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋى) سايكەس، سوتقا دەيىنگى تەرگەۋ باستالدى. تەرگەۋ سونىمەن قاتار، بوتەن كولىكتى زاڭسىز يەلەنۋ، بوتەننىڭ مۇلكىن ۇرلاۋ دەرەكتەرى بويىنشا دا جۇرگىزىلەتىن بولادى. كۇدىكتى ق ر قپك-نىڭ 128-بابىنا سايكەس ۋاقىتشا ۇستاۋ يزولياتورىنا قامالدى»، – دەدى ءشارىپوۆ.