الماتى قالالىق مامانداندىرىلعان اۋدانارالىق قىلمىستىق سوتى ادام اعزالارىن زاڭسىز ساتىپ الۋ جانە ساتۋ ىسىمەن اينالىسقان ازاماتقا ۇكىم شىعاردى.
2023 جىلدىڭ كۇزىندە ۇيىمداسقان قىلمىسقا قارسى كۇرەس قىزمەتكەرلەرى ەلدىڭ بىرنەشە وڭىرىندە ارنايى جەدەل تەرگەۋ جۇرگىزدى، دەپ حابارلايدى aqshamnews.kz.
ناتيجەسىندە، قارا نارىقتا ادام اعزالارىن ساتۋمەن اينالىسقان توپ ۇستالدى. ولاردىڭ اراسىندا دونور ىزدەۋشىلەر عانا ەمەس، مەديسينا قىزمەتكەرلەرى مەن نوتاريۋستار دا بولعان. الايدا ۇستالعان كۇدىكتىلەردىڭ ىشىندە تەك ەكى ادام عانا سوتقا تارتىلىپ، ولار شارتتى جازاعا كەسىلدى.
بۇيرەك جەتكىلىكسىزدىگىنە شالدىققان يسلام ۇزاقباي 2021 جىلى تۇركيادا بۇيرەك ترانسپلانتاسياسىن جاساتقان. الماتىداعى مەديسينالىق ورتالىقتا ەم قابىلداپ جۇرگەن كەزدە، ول ناۋقاستارعا دونور تاۋىپ بەرۋ ارقىلى اقشا تابۋعا بولاتىندىعىن ويلاعان. بۇل ءىستى جالعىز ءوزى جۇزەگە اسىرا المايتىنىن تۇسىنگەن سوڭ، تەرگەۋدە انىقتالماعان "ايمان" ەسىمدى اداممەن بايلانىسقا شىققان.
ۇزاقباي گەمودياليز كەزىندە بۇيرەك ترانسپلانتاسياسىنا مۇقتاج ناۋقاسپەن تانىسىپ، وعان دونور تابۋعا كومەكتەسەتىنىن ايتىپ، 10 ميلليون تەڭگە تالاپ ەتكەن. باستاپقىدا جىگىت بۇل ۇسىنىستى قابىلداماعانىمەن، ۇزاقباي وعان ءجيى حابارلاسىپ، سەنىمىنە كىرگەن. ناۋقاستىڭ جاعدايى ناشارلاعان سوڭ، ونىڭ تۋىستارى ترانسپلانتاسيا جاساۋعا كەلىسىم بەرەدى. ۇزاقباي وپەراسيانى رەسمي تۇردە كۆوتا ارقىلى جاساۋعا ۋادە بەرىپ، 10 ميلليون تەڭگە سۇراتقان.
وسى ۋاقىتتا "ايمان" ەسىمدى ايەل ينتەرنەت ارقىلى استانادا بۇيرەگىن 8 ميلليون تەڭگەگە ساتۋعا كەلىسكەن ادامدى تاپقان. ول دونورعا الماتىداعى سىزعانوۆ اتىنداعى ۇلتتىق عىلىمي حيرۋرگيا ورتالىعىندا وپەراسيا جاساتۋعا ۋادە بەرگەن. تەكسەرۋدەن كەيىن وپەراسيا ءساتتى وتكەن، الايدا ۇزاقباي ناۋقاستان دونورعا تاعى 10 ميلليون تەڭگە تولەۋدى تالاپ ەتكەن. وسىلايشا، العاشقى كليەنت جالپى 20 ميلليون تەڭگە تولەگەن.
بۇل ءىستىڭ ءتيىمدى ەكەنىن تۇسىنگەن ۇزاقباي تاعى ءبىر ناۋقاس پەن دونور تاۋىپ، ۇلتتىق عىلىمي حيرۋرگيا ورتالىعىندا وپەراسيا جاساتۋدى جوسپارلاپ جاتقاندا ۇستالعان. سوت شەشىمى بويىنشا، ول 4 جىلعا شارتتى تۇردە باس بوستاندىعىنان ايىرىلدى. بۇيرەگىن ساتپاق بولعان دونور دا كىنالى دەپ تانىلىپ، 2 جىلعا شارتتى جازاعا كەسىلدى.