كورمەگە ءارتىستىڭ جەكە زاتتارى مەن فوتوقۇجاتتارى قويىلعان.
قازاقستانعا ەڭبەگى سىڭگەن ونەر قايراتكەرى، حالىق ءارتىسى ءاسانالى ءاشىموۆتىڭ 85 جىلدىعى قارساڭىندا «ابىزعا اينالعان ءاسانالى» اتتى كورمەنىڭ اشىلۋى ءوتتى، دەپ حابارلايدى Almaty-akshamy.kz Almaty.tv سىلتەمە جاساپ.
مادەني شارادا ونەر مايتالمانىنىڭ جەكە زاتتارى مەن فوتوقۇجاتتارى، دوستارى مەن ارىپتەستەرىنەن كەلگەن سىيلىقتارى قويىلىپ، كوپشىلىك نازارىنا ۇسىنىلدى. كورمەگە ءاسانالىنىڭ زامانداستارى مەن ونەر يەلەرى جانە قالا اكىمىنىڭ ورىنباسارى ارمان قىرىقبايەۆ قاتىسىپ، ىزگى تىلەكتەرىن ءبىلدىردى.
«جالپى، قازاق – ءسوزى ۇزىن حالىقپىز عوي. قازىرگى ۋاقىتتا ءسوزدىڭ تاۋسىلعانىن بايقاپ ءجۇرمىن. ويتكەنى سوڭعى 15-20 جىلدىڭ كولەمىندە ءاسانالىنى ايتىستىڭ تورىنە وتىرعىزىپ، ءتوراعا دەپ... ءار جەردە تانىستىرعان سايىن ءاسانالىنىڭ ءار سيپاتىن ايتامىن دەپ ءسوزىم تاۋسىلدى. ءوزىڭدى-وزىڭ قايتالاي بەرمەيسىڭ عوي»، – دەدى اقىن، قازاقستاننىڭ ەڭبەك سىڭىرگەن قايراتكەرى ءجۇرسىن ەرمان.
ءاسانالى ءوزى سومداعان كەيىپكەرلەرىن تاۋداي تالانتى ارقىلى اسقان شەبەرلىكپەن ويناپ، كورەرمەننىڭ شىنايى ىقىلاسىنا بولەنگەن جان. ونىڭ بۇل قاسيەتى كوركەمدىك الەمىنىڭ وزگەلەردەن ەرەكشە، شىعارماشىلىققا دەگەن سۇيىسپەنشىلىگىن كورسەتىپ تۇر.
«ءبىزدىڭ تەاترىمىزدا، قۇداي قالاسا، ءاسانالىنىڭ تۋعان كۇنى - 8 مامىردا العاش رەت جاڭا جانردا ينتەراكتيۆتى سپەكتاكل دايىپ جاتىرمىز. وعان ەلىمىزدىڭ كورەرمەنى قاتىساتىن بولادى. سول كەزدە دە بارشاڭىزبەن قاۋىشامىز دەپ ويلايمىن»، – دەدى م.اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك.