الماتىداعى جەل ەلەكتر ستانسياسى تامىز ايىندا جۇمىس ىستەي باستايدى

ستانسيا جىلىنا 225،7 ملن كۆتس ەلەكتر ەنەرگياسىن وندىرەتىن بولادى.

الماتى قالاسىنان 140 شاقىرىم قاشىقتىقتا سالىنىپ جاتقان قۋاتى 60 مۆت جاڭا جەل ەلەكتر ستانسياسى بيىلعى تامىز ايىنىڭ باسىندا پايدالانۋعا بەرىلەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«سامۇرىق-ەنەرگو» اق باسپا ءسوز قىزمەتىنىڭ مالىمەتىنشە، ستانسيا جىلىنا 225،7 ملن كۆتس ەلەكتر ەنەرگياسىن وندىرەتىن بولادى. جەس سالۋ جانە ىسكە قوسۋ پارنيكتىك گازدار شىعارىندىلارىن 206 مىڭ تونناعا دەيىن ازايتۋعا مۇمكىندىك بەرەدى، سونداي-اق جىلىنا شامامەن 89 مىڭ توننا ءداستۇرلى وتىننىڭ ورنىن باسادى.

«ەنەرگەتيكالىق نىسان الماتى وبلىسىنىڭ ەڭبەكشىقازاق اۋدانىندا شەلەك دالىزىندە سالىنىپ جاتىر. مۇندا جەلدىڭ ورتاشا جىلدىق جىلدامدىعى – 50 مەتر بيىكتىكتە سەكۋندىنا 7،8 مەتر، ال اعىننىڭ تىعىزدىعى – 310 ۆت/م2. بولاشاقتا جەس قۋاتىن 300 مۆت-قا دەيىن ارتتىرۋ جوسپارلانۋدا»، - دەلىنگەن باسپا ءسوز قىزمەتىنىڭ مالىمەتىندە.

جوبانىڭ جالپى قۇنى – 37،4 ملرد تەڭگە. ونى «سامۇرىق-ەنەرگو» اق قازاقستاندىق ەلەكتر ەنەرگەتيكالىق حولدينگى «Power China» كورپوراسياسىمەن سەرىكتەستىكتە ىسكە اسىرۋدا.