الماتىدا قازاقتىڭ ۇلى اقىنى، ويشىل ءارى اعارتۋشى اباي قۇنانباي ۇلىنىڭ 180 جىلدىعىنا ارنالعان اۋقىمدى باعدارلاما باستالدى.
تامىز بويى قالادا 120-دان اسا ءىس-شارا جوسپارلانعان. ولاردىڭ قاتارىندا – تەاتر قويىلىمدارى، پوەزيا كەشتەرى، ادەبي ساعاتتار، كورمەلەر، كونسەرتتەر، جاستارمەن كەزدەسۋلەر، سونداي-اق سپورتتىق، قايىرىمدىلىق جانە اعارتۋشىلىق اكسيالار بار.
مەرەيتويدىڭ باستى سالتاناتى 10 تامىزدا – ابايدىڭ تۋعان كۇنىندە وتەدى.
ساعات 10:00-دە رەسپۋبليكا سارايىنىڭ الدىنداعى اباي الاڭىندا ۇلى اقىننىڭ ەسكەرتكىشىنە گۇل شوقتارىن قويۋ ءراسىمى وتەدى.
ال ساعات 12:00-دە ءدال وسى الاڭدا "الاشتىڭ ابايى" اتتى مۋزىكالىق-درامالىق كونسەرت ۇيىمداستىرىلادى. كونسەرتكە ءاسانالى ءاشىموۆ، تۇڭعىشباي جامانقۇلوۆ، سايات مەرەكە ۇلى، روزا رىمبايەۆا، ايگۇل قوسانوۆا جانە وزگە دە تانىمال ونەر يەلەرى قاتىسادى. باعدارلامادا – اباي شىعارمالارىنان شابىتتانعان تەاترلاندىرىلعان كورىنىستەر، پوەزيا، ۆوكالدىق جانە اسپاپتىق نومىرلەر ۇسىنىلادى.
ءىس-شارالار قالانىڭ بارلىق سەگىز اۋدانىندا وتەدى.
ماسەلەن، 8 تامىزدا ساعات 11:00-دە №6 كىتاپحانادا "ولمەيتۇعىن ارتىنا ءسوز قالدىرعان" اتتى پوەزيا كەشى وتەدى. جازۋشى نۇرداۋلەت اقىش پەن اقىن-فيلوسوف مۇراتحان شوقان ابايدىڭ بۇگىنگى قوعامداعى ءرولى جايلى وي بولىسەدى.
سول كۇنى قازاقستان جازۋشىلارى كىتاپحاناسىندا "اسىل ءسوزدى ىزدەسەڭ، ابايدى وقى، ەرىنبە" اتتى دوڭگەلەك ۇستەل ۇيىمداستىرىلادى.
س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەيىندە ساعات 15:00-دە "جارقىن جۇلدىزدار" ەڭبەگى نەگىزىندە اباي شىعارماشىلىعىنا ارنالعان ماتەريالدار ۇسىنىلادى.
9 تامىزدا ساعات 15:00-دە دىنمۇحامەد قونايەۆتىڭ مەموريالدىق مۋزەيىندە "ۇلى اباي" اتتى ءدارىس وتەدى. وندا اقىن بەينەسى تاريحي جانە ادەبي كونتەكستە سارالانادى.
10 تامىزدا 10:00-دە ماحاتما گاندي اتىنداعى ساياباقتا №4 كىتاپحانا-فيليال "جۇرەگىمنىڭ تۇبىنە تەرەڭ بويلا" اتتى ارت-كومپوزيسيا وتكىزەدى. باعدارلامادا – ادەبي ويىندار، ولەڭ وقۋ، اباي اندەرىن ورىنداۋ، سونداي-اق "عالامنىڭ جىر داناسى – ۇلى اباي" اتتى كورمە ۇسىنىلادى.
28 تامىزدا ساعات 19:00-دە رەسپۋبليكا سارايىندا "ابايعا تاعزىم" اتتى مەرەكەلىك كونسەرت وتەدى. قويىلىم ابايدىڭ رۋحاني جولىن مۋزىكا، تەاتر جانە ءبيدى بىرىكتىرە وتىرىپ ساحنالايدى.
قىركۇيەكتە مەملەكەتتىك قۋىرشاق تەاترىندا "مەن ءبىر جۇمباق اداممىن… اباي" سپەكتاكلىنىڭ پرەمەراسى وتەدى (جاس شەكتەۋى: 16+). قويىلىم مۇحتار اۋەزوۆتىڭ "اباي جولى" رومانى مەن "قارا سوزدەرى" نەگىزىندە ساحنالانىپ، اقىننىڭ ىشكى جان دۇنيەسىن، پاراساتى مەن رۋحاني تەرەڭدىگىن اشادى.
بارلىق ءىس-شارا ازاماتتاردى، اسىرەسە، جاستاردى ۇلتتىق مادەنيەتكە جاقىنداتۋعا، قازاق ادەبيەتىنە دەگەن قىزىعۋشىلىقتى ارتتىرۋعا جانە اباي قۇنانباي ۇلىنىڭ رۋحاني مۇراسىن تەرەڭ ۇعىنۋعا باعىتتالعان. اباي تۇلعاسى ادامگەرشىلىك پەن اعارتۋشىلىقتىڭ، جاندى قازاق ويىنىڭ سيمۆولى.