پروكۋرور سوتتان ايىپتالۋشىلاردى 8 جىلعا باس بوستاندىعىنان ايىرۋدى سۇرادى
بۇگىن الماتىنىڭ المالى اۋداندىق سوتى «الماتى سپەستەحپاركينگ سەرۆيس» ج ش س بۇرىنعى ديرەكتورى مارات پىرىنبەكوۆ پەن Alan Parking ج ش س بۇرىنعى باس ديرەكتورى مۇحتار بازاربايەۆقا ۇكىم شىعاردى، دەپ حابارلايدى Almaty-akshamy.kz.
سوتتا انىقتالعانداي، سوتتالۋشى پ. «ا» ج ش س ديرەكتورى بولا تۇرا، جاۋاپكەر ب.-مەن الدىن الا ءسوز بايلاسىپ، ءبىر توپ اداممەن بىرگە 225 630 072 تەڭگە («پ» ج ش س شوتىنا اۆتوتۇراق اقىسىنان تۇسكەن) قارجىنى جىمقىرعان.
بۇدان بولەك سوتتالۋشى ب. «ا» ج ش س باس ديرەكتورى بولا تۇرا، ىزدەۋدە جۇرگەن اداممەن الدىن الا كەلىسىپ، ءبىر توپ اداممەن اۆتوتۇراقتان جينالعان 190 078 778 تەڭگە سوماسىندا اسا ءىرى كولەمدەگى اقشانى ۇرلاعان.
سوتتالۋشىلاردىڭ قىلمىستىق ارەكەتىنەن مەملەكەتكە جالپى سوماسى 436 040 706 تەڭگە بولاتىن، قوس كومپانيانىڭ پايداسىنىڭ 30% مولشەرىندە ديۆيدەند تۇسپەگەن.
«سوتتالۋشى ب. باسقا ادامدارمەن توپتاسىپ، ۇرلىق جاساعاننان كەيىن 391 651 076 تەڭگە ۇرلانعان قاراجاتتىڭ ءبىر بولىگىن جالعان مامىلە جاساپ، زاڭداستىرۋ ارقىلى زاڭدى اينالىمعا تۇسىرگەن»، - دەپ حابارلادى الماتى قالاسى سوتىنىڭ باسپا ءسوز قىزمەتى.
قىلمىستىق ءىستى قاراۋ بارىسىندا مەملەكەتكە كەلگەن زيان تولىق كولەمدە وتەلدى.
سوتتالۋشىلاردىڭ كىناسى ەكونوميكالىق ساراپتامامەن، اۋديتورلىق قورىتىندىمەن، كۋالاردىڭ ايعاقتارىمەن جانە ءىستىڭ باسقا ماتەريالدارىمەن دالەلدەندى.
ايتا كەتسەك، سوتتا ايىپتالۋشىلار اقىلى اۆتوماتتاندىرىلعان اۆتوتۇراق ەنگىزۋ جوباسىنىڭ مەملەكەتكە ءتيىمدى ەكەنىن كورسەتىپ، كىناسىن مويىندامادى.
ولاردىڭ ايتۋىنشا، مەملەكەت ءوز تاراپىنان بۇل جوباعا اقشا سالماي، سالىق ايىپپۇلدارى مەن ديۆيدەند تۇرىندەگى جەڭىلدىكتەرگە يە بولعان.
پروكۋرور سوتتان ايىپتالۋشىلاردى 8 جىلعا باس بوستاندىعىنان ايىرۋدى سۇرادى.
«ۇكىم تاعايىنداۋ كەزىندە سوت جازانى جەڭىلدەتەتىن ءمان-جايلاردى، بۇرىن سوتتىلىعىنىڭ بولماۋىن جانە مەملەكەتكە كەلتىرىلگەن زياندى تولىق كولەمدە وتەيتىنىن ەسكەردى، سوتقا دەيىنگى تەرگەۋ ورگاندارى اۋىرلاتاتىن ءمان-جايلاردى انىقتاعان جوق»،- دەلىنگەن حابارلامادا.
قىلمىسقا قاتىسۋشىلاردىڭ ءارقايسىسىنىڭ قىلمىستىق ءرولىن، جەڭىلدەتەتىن ءمان-جايدى ەسكەرە وتىرىپ، سوت پىرىنبەكوۆتى 5 جىلعا، بازاربايەۆتى 6 جىل 6 ايعا باس بوستاندىعىنان ايىرۋعا، جازاسىن قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەلەرىندە وتەۋگە ۇكىم ەتتى.
سوت ۇكىمى زاڭدى كۇشىنە ەنگەن جوق.