تۇركياداعى جەر سىلكىنىسىنىڭ سالدارىن جويۋعا قاتىسقان قۇتقارۋشىلار ماراپاتتالدى
6 ناۋرىزدا توتەنشە جاعدايلار ءمينيسترى يۋريي يلين تۇركيادا ىزدەستىرۋ-قۇتقارۋ جۇمىستارىنا قاتىسقان استانا، اقمولا جانە قاراعاندى وبلىستارىنىڭ قۇتقارۋشىلارىنا، ساك قىزمەتكەرلەرىنە ماراپاتتاردى سالتاناتتى تۇردە تاپسىرىپ، پرەزيدەنتتىڭ العىسىن جاريالادى، دەپ حابارلايدى Almaty-akshamy.kz Zakon.kz-كە سىلتەمە جاساپ.
تۇركياداعى جويقىن جەر سىلكىنىسىن جويۋ كەزەڭىندە قىزمەتتىك مىندەتتەرىن ادال اتقارعانى جانە كورسەتكەن ەرلىگى ءۇشىن بارلىعى 59 قىزمەتكەر ماراپاتتالدى، ونىڭ ىشىندە 8 قىزمەتكەر مەملەكەتتىك ناگرادالارعا يە بولدى، 51 قىزمەتكەر قازاقستان رەسپۋبليكاسى پرەزيدەنتىنىڭ العىس حاتىمەن جانە ۆەدومستۆولىق ناگرادالارمەن ماراپاتتالدى.
مينيستر رەسپۋبليكا پرەزيدەنتىنىڭ اتىنان جانە ءوز اتىنان ادام ءومىرىن ساقتاپ قالۋعا مۇمكىندىك بەرگەن توتەنشە جاعدايلاردا كورسەتكەن باتىلدىعى مەن جوعارى كاسىبيلىگى ءۇشىن ۇيقىلارىن اياماي باتىلدىق تانىتىپ، ەرجۇرەكتىكپەن ەڭبەك ەتكەن بارلىق ماراپاتتالعاندارعا العىس ايتتى.
"ماراپاتتار كوپ بولىپ، كوپ رەت قولتاڭبا قويۋ قاجەت بولعاندا، فاكسيميل (قولتاڭبانىڭ كوشىرمەسى) پايدالانىلادى. ءبىراق بۇل ارادا مەملەكەت باسشىسى ءوز مىندەتىن ادال اتقارعان قىزمەتكەرلەرگە قۇرمەت كورسەتىپ، تۇركياداعى جەر سىلكىنىستەرىنىڭ سالدارىن جويۋعا قاتىسقان بارلىق قۇتقارۋشىلار ماراپاتىنا جەكەلەي قول قويىپ شىقتى. بۇل دا - سىزدەر اتقارعان جۇمىسقا دەگەن قۇرمەت، ەرەكشە ءىلتيپات. مەنىڭ ويىمشا، ءبىز ىستەپ جاتقان جۇمىس ادامدارعا قاجەت ءارى پايدالى"، - دەدى يۋريي يلين.
سونداي-اق ول قۇتقارۋشىلارعا الدا سۋ تاسقىنى ءقاۋپى بار ەكەنىن جانە ونى ءورت ءقاۋپى ارتقان كەزەڭدەگىدەي، شومىلۋ ماۋسىمىنداعىداي اسا از شىعىندار مەن تاۋەكەلدەر ارقىلى اتقارۋ كەرەكتىگىن ەسكە سالۋعا اسىقتى.
"بىزدە بەيبىت ۋاقىتتا ەرلىك جاساۋعا كوپتەگەن مۇمكىندىك بار. ەڭ باستىسى، ءارقايسىڭىز ءارقاشان ۇيگە امان-ەسەن ورالۋلارىڭىزدى تىلەيمىن"، - دەدى يۋريي يلين.
قاراعاندى قالاسىنىڭ باس قۇتقارۋشىسى نۇرعالي جاقييەۆ باسقا قازاقستاندىق قۇتقارۋشىلارمەن بىرگە تۇركيانىڭ نۋرداگى قالاسىندا جۇمىس ىستەگەندەرىن ايتتى. ولار وپىرىلىپ تۇسكەن التى قاباتتى ءۇيدىڭ ءۇيىندىسىن ارشىپ، تازالاعان.
"ەڭ قيىنى ۇيىندىلەردى ارشۋ بولدى. بۇل - ءمونوليتتى ءۇي، بارلىق جەردە ارماتۋرا، تۇرمىستىق زاتتار بار، ءبىز ولاردى تازالاپ، ءاردايىم ۇمىتتە بولدىق. تىرىلەر بولسا دەپ، ارينە. ءبىز ءۇش ادامدى ءۇيىندى استىنان تىرىدەي الىپ شىقتىق. اناسى، قىزى جانە ەر ادام"، - دەيدى نۇرعالي جاقييەۆ.
اقمولا وبلىسى بويىنشا تجد "ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى" مم جەدەل-قۇتقارۋ جاساعىنىڭ باس قۇتقارۋشىسى عاني قۇسايىنوۆ باسقا قۇتقارۋشىلارمەن بىرگە گازيانتەپ قالاسىنداعى جەتى قاباتتى ءۇيدىڭ ورنىنداعى ءۇيىندىنى ارشىپ، تازالاعان.
"بۇل وپەراسياداعى ەڭ قيىنى - ادامدى ءولى كۇيىندە الىپ شىققاندا ونىڭ تۋىستارىنىڭ كوزىنە قاراۋ. بۇل - ەڭ قيىن جاعداي، ال ءبىزدىڭ جۇمىسىمىزعا كەلەتىن بولساق، ءبىز پسيحيكالىق جانە فيزيكالىق تۇرعىدان قيىن جاعدايدا جۇمىس ىستەۋگە دايىن بولدىق. الدىمىزعا تاپسىرما قويىپ، جۇمىس وبەكتىسىن بەلگىلەدى، ودان كەيىن ءبىز ءوز جۇمىسىمىزعا كىرىستىك، ەموسياعا بەرىلەتىندەي كۇيدە بولمادىق، ويتكەنى ۋاقىت تىعىز، ءار سەكۋند ساناۋلى. وكىنىشكە قاراي، ءبىز ەشكىمدى تىرىدەي تاپپادىق. 25 ادامنىڭ دەنەسىن ءۇيىندى استىنان الىپ شىقتىق"، - دەدى عاني قۇسايىنوۆ.
وتكەن اپتادا مينيستر تۇركياداعى جەر سىلكىنىسىن جويعان الماتى قالاسىنداعى تجم رەسپۋبليكالىق جەدەل-قۇتقارۋ جاساعىنىڭ قۇتقارۋشىلارىن ماراپاتتادى. ولارعا مەملەكەتتىك ناگرادالار، ق ر پرەزيدەنتىنىڭ العىس حاتتارى، سونداي-اق ۆەدومستۆولىق ناگرادالار - مەدالدار مەن توسبەلگىلەر تابىس ەتىلدى.
ەستەرىڭىزگە سالا كەتەيىك، مەملەكەت باسشىسىنىڭ تاپسىرماسى بويىنشا، 7 اقپاندا قۇتقارۋ بولىمشەلەرىنىڭ كۇشتەرى مەن قۇرالدارى، ونىڭ ىشىندە قازاقستان تجم قۇتقارۋشىلارى، اپاتتار مەديسيناسى ورتالىعىنىڭ دارىگەرلەرى جانە كينولوگيالىق ەسەپتوپتار العاشقىلاردىڭ ءبىرى بولىپ ەكى ەشەلونمەن جولعا شىعىپ، ەڭ كۇردەلى قيراعان وبەكتىلەردە ىزدەستىرۋ-قۇتقارۋ جۇمىستارىن جۇرگىزۋگە كىرىستى. قازاقستاندىق قۇتقارۋشىلار توبىن تج ءبىرىنشى ۆيسە-مينيسترى يبراگيم كۇلشىمبايەۆ باسقاردى.
تۇركيانىڭ ءۇش وڭىرىندە ىزدەستىرۋ-قۇتقارۋ جۇمىستارىن جۇرگىزۋ باستالعاننان بەرى قازاقستان تجم قۇتقارۋشىلارىنىڭ كۇشىمەن 7 ادام قۇتقارىلدى. قازا تاپقان 88 ادامنىڭ، ونىڭ ىشىندە 10 بالانىڭ دەنەسى شىعارىلدى.
قازاقستان تجم اپاتتار مەديسيناسى ورتالىعىنىڭ دارىگەرلەرى دە تاۋلىك بويى زارداپ شەككەندەرگە بىلىكتى مەديسينالىق كومەك كورسەتتى. بارلىق جۇمىس كەزەڭىندە 200-دەن استام جەرگىلىكتى تۇرعىندار مەن قۇتقارۋشىلارعا، ونىڭ ىشىندە 30-عا جۋىق بالاعا مەديسينالىق كومەك كورسەتىلدى. جەرگىلىكتى تۇرعىنداردا سترەسسكە جەدەل رەاكسيامەن، گيپوتەرميامەن، تىنىس الۋ ورگاندارىنىڭ اۋرۋلارىمەن، سونداي-اق ءارتۇرلى جاراقاتتارمەن بايلانىستى اۋرۋلار باسىم بولدى. پنيەۆموكاركاس مودۋلىنە نەگىزدەلگەن مەديسينالىق پوست ىزدەۋ ناتيجەلەرىن كۇتكەن زارداپ شەككەندەردىڭ تۋىستارى ءۇشىن باسپانا بولدى. بۇل مودۋل قيراعان عيماراتتاردىڭ اراسىندا قالعان ادامدار ءۇشىن جىلىتۋ پۋنكتى رەتىندە دە پايدالانىلدى.
ءبىزدىڭ كينولوگيالىق ەسەپتوپتارىمىز ىزدەۋ-قۇتقارۋ جۇمىستارىندا دا تاماشا ناتيجەلەر كورسەتتى جانە ۇيىندىلەر استىنداعى ادامداردى ىزدەۋ كەزىندە وزدەرىنىڭ جوعارى بىلىكتىلىگىن راستادى. قۇتقارۋشى يتتەر - بەلگيالىق مالينۋا دجەيكوب، ليگا م سيريۋس جانە اكسەل، لابرادور چارلي كينگ، نەمىس توبەتى ميرتا، گرينپيس، بوردەر كوللي نۇسقاۋشىلارمەن جانە قۇتقارۋشىلار وتريادتارىمەن بىرگە ءار ادامنىڭ ءومىرى ءۇشىن بىرنەشە كۇن بويى قيراعان نىسانداردا جۇمىس ىستەدى.