الماتىدا قوعامدىق كولىك جۇيەسىن دامىتۋ جانە ەكولوگيالىق جاعدايدى جاقسارتۋ اياسىندا قالالىق اۆتوبۋستاردى جاڭارتۋ جالعاسۋدا. جەكە اۆتوپاركتەردىڭ ءبىرى 18 قاڭتاردا مارشرۋتقا شىعاتىن ەلەكتر اۆتوبۋستارىنىڭ ساتىپ الدى، دەپ حابارلايدى aqshamnews.kz
«Golden Dragon» ماركالى تومەن ەدەندى ەلەكتر اۆتوبۋستارى 300 كم دياپازونعا يە، ءۇنسىز، كونديسيونەرلەرمەن، بەينەباقىلاۋ كامەرالارىمەن جانە باسقا دا زاماناۋي جۇيەلەرمەن جابدىقتالعان. بۇل اۆتوبۋستار №98 مارشرۋتتا «رايىمبەك» مەترو ستانسياسى - «باي-تال» تك قاتىنايتىن بولادى.
الماتى قالالىق موبيلدىلىك باسقارماسى باسشىسىنىڭ ورىنباسارى باۋىرجان قۇمارعازين قوعامدىق كولىكتى دامىتۋ جونىندەگى جۇمىستاردىڭ ارقاسىندا قالادا جىل سايىن جولاۋشىلار اعىنى وسەتىنىن جانە قازىرگى ۋاقىتتا كۇنىنە 1،6 ملن. جۋىق ساپار جاسالاتىنىن اتاپ ءوتتى.
«الماتى اگلومەراسياسىمەن كولىكتىك بايلانىستى قامتاماسىز ەتۋ ءۇشىن وتكەن جىلى ءبىز 20 جاڭا قالا ماڭىنداعى مارشرۋتتاردى ۇيىمداستىردىق. قالانىڭ 2030 جىلعا دەيىنگى كولىك قاڭقاسىنىڭ ماستەر-جوسپارىن ىسكە اسىرۋ اياسىندا كوكتەمدە جەلتوقسان كوشەسى مەن رايىمبەك داڭعىلىنىڭ بويىندا ەكى BRT جەلىسىن سالۋعا كىرىسەمىز. سونداي-اق، اكىمدىك قىزمەت كورسەتۋ ساپاسىن ارتتىرۋعا باعىتتالعان تاسىمالداۋشىلاردى سۋبسيديالاۋدىڭ جاڭا قاعيدالارىن ازىرلەدى»، - دەپ اتاپ ءوتتى ول.
ءوز كەزەگىندە «City Bus» اۆتوبۋس پاركىنىڭ ديرەكتورى دانيار بايعاباتوۆ كومپانيا 14 ەلەكتروبۋس ساتىپ العانىن حابارلادى.
«كولىك ينفراقۇرىلىمىن جاقسارتۋ، جاڭا تەحنولوگيالاردى ەنگىزۋ جانە تاسىمالداۋ سالاسىنداعى ناقتى ەرەجەلەر بىزگە ۇزاق مەرزىمدى پەرسپەكتيۆادا جوسپارلاۋعا، جىلجىمالى قۇرامدى جاڭارتۋعا، كاسىبي كادرلاردى تارتۋعا مۇمكىندىك بەرەدى. الداعى ۋاقىتتا تاعى 60 ەلەكتر اۆتوبۋسىن ساتىپ الۋدى جوسپارلاپ وتىرمىز»، - دەدى اۆتوپارك باسشىسى.
ايتا كەتەرلىگى، اعىمداعى جىلى الماتىدا اكىمدىك جانە جەكە تاسىمالداۋشىلار 800 گاز اۆتوبۋسى مەن 260 ەلەكتروبۋس ساتىپ الۋدى جوسپارلاپ وتىر، بۇل اۆتوبۋستاردىڭ ورتاشا پايدالانۋ مەرزىمىن 2 جىلعا دەيىن تومەندەتۋگە مۇمكىندىك بەرەدى.