الماتى قالاسىندا ۇلى وتان سوعىسىنداعى جەڭىستىڭ 80 جىلدىعىنا ارنالعان «باتىرلار سويلەيدى…» اتتى اۋقىمدى الەۋمەتتىك جوبانىڭ فينالى ءوتتى، دەپ حابارلايدى aqshamnews.kz
قالا مەكتەپتەرىنىڭ 9000-عا جۋىق وقۋشىسى، پەداگوگتەرى مەن اتا-انالار قاۋىمداستىعى اتسالىسقان بۇل باستاما - جاس ۇرپاقتىڭ بويىندا وتانسۇيگىشتىك رۋحتى قالىپتاستىرۋعا باعىتتالعان ماڭىزدى قادام بولدى.
جوبانى الماتى قالاسى ءبىلىم باسقارماسىنا قاراستى قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعى ۇيىمداستىردى.
مەكتەپىشىلىك، اۋداندىق جانە قالالىق ءۇش كەزەڭنەن تۇرعان «باتىرلار سويلەيدى…» جوباسىنىڭ قورىتىندى كەزەڭىنە مەگاپوليستەگى 216 مەكتەپتەن ىرىكتەلىپ شىققان ۇزدىك كوماندالار قاتىستى.
فينالدا وقۋشىلار سوعىس جىلدارىندا ەرلىك كورسەتكەن قاھارماندار - مانشۇك مامەتوۆا، ءاليا مولداعۇلوۆا، باۋىرجان مومىش ۇلى، نۇركەن ءابدىروۆ، حيۋاز دوسپانوۆا، تالعات بيگەلدينوۆ جانە باسقا دا باتىرلاردىڭ بەينەسىن ساحنادا كوركەم تۇردە سومدادى. تەاترلاندىرىلعان قويىلىمدار، ادەبي-مۋزىكالىق كومپوزيسيالار مەن مايدان اندەرى ارقىلى ولار باتىرلاردىڭ رۋحىن تىرىلتكەندەي اسەر قالدىردى. زاماناۋي جاساندى ينتەللەكت تەحنولوگيالارىنىڭ كومەگىمەن باتىرلاردىڭ داۋىسى مەن بەينەسى قايتا جاڭعىرىپ، جاس ۇرپاققا ءۇن قاتتى.
قالالىق ادىستەمەلىك ورتالىق ديرەكتورى داۋرەن ساعىنعالييەۆتىڭ ايتۋىنشا، بۇل جوبا - الماتى ءبىلىم جۇيەسىندەگى ەڭ اۋقىمدى ءارى مازمۇنى تەرەڭ شارالاردىڭ ءبىرى.
– ۇلى جەڭىستىڭ قاھارماندارى — وتكەننىڭ عانا ەمەس، بۇگىن مەن بولاشاقتىڭ دا رۋحاني تەمىرقازىعى. بۇل جوبانىڭ نەگىزگى ماقساتى – تاريحىمىزداعى ەرلىك پەن ەلدىك ۇلگىلەرىن بۇگىنگى جاس بۋىننىڭ ساناسىنا ءسىڭىرۋ، – دەدى ول.
جوبا اياسىندا قالا مەكتەپتەرىندە 2500-دەن استام پاتريوتتىق باعىتتاعى ءىس-شارالار ءوتتى. ال الەۋمەتتىك جەلىلەردە 600-دەن استام بەينەروليك پەن 3000-نان استام ماتەريال جاريالانىپ، قوعامدا كەڭ قولداۋ مەن تەرەڭ اسەر تۋدىردى.