الماتىدا جاستار اراسىنداعى جۇمىسسىزدىق دەڭگەيى بيىلعى جىلدىڭ ءبىرىنشى توقسانىندا 5،2%-دان 4،6%-عا دەيىن تومەندەدى.
الماتىدا جاستار ءۇشىن تاعى ءبىر جاڭا تارتىلىس نۇكتەسى اشىلادى
الماتى قالاسىنىڭ اكىمى ەربولات دوسايەۆ جەتىسۋ اۋدانىن ارالاۋ بارىسىندا جاستاردىڭ كوميۋنيتي ورتالىعىن اشۋعا ارنالعان جاڭا عيماراتتا بولدى، دەپ حابارلايدى Almaty-akshamy.kz.
ايتا كەتەيىك، بۇل اۋدانداعى كوميۋنيتي ورتالىقتىڭ ەكىنشى فيليالى، ءبىرىنشىسى بوتكين كوشەسى، 16 مەكەنجايىندا ورنالاسقان.
جالپى اۋدانى 645 شارشى مەتر عيمارات وسى جىلدىڭ ءساۋىر ايىندا بوس جەردە سالىنعان. جاڭا كوميۋنيتي ورتالىقتى اشۋ ءۇشىن ينكليۋزيۆتى ءتاسىلدى ەسكەرە وتىرىپ، جاڭعىرتىلىپ جاتىر. سونداي-اق، ورتالىق اۋماعىندا شاعىن ساحنا مەن باسكەتبول الاڭىن ورنالاستىرۋ جوسپارلانعان. جۇمىستى 2 ايدىڭ ىشىندە اياقتاۋ كوزدەلگەن.
اشىلعان سوڭ مۇندا كرەاتيۆتى قوعامدىق كەڭىستىك پايدا بولىپ، ءارتۇرلى مەملەكەتتىك باعدارلامالار بويىنشا كەڭەس بەرۋ، پسيحولوگيالىق جانە زاڭگەرلىك كومەك، جاڭا ماماندىق الۋ بويىنشا قىسقا مەرزىمدى كۋرستار سىندى جاستارعا قاجەتتى قولداۋ شارالارى ۇسىنىلادى.
ەربولات دوسايەۆ ءار اۋداندا جاستارعا ارنالعان كوميۋنيتي ورتالىقتار قۇرۋ تاجىريبەسى وڭ ناتيجە بەرگەنىن اتادى. بيىلعى ءبىرىنشى توقساننىڭ وزىندە 9 مىڭنان استام جاس جۇمىسقا ورنالاستىرىلدى، ال جاستار اراسىنداعى جۇمىسسىزدىق دەڭگەيى 5،2%-دان 4،6%-عا دەيىن قىسقاردى.
قالادا الماتى اكىمدىگىنىڭ جوبالىق كەڭسەسى اياسىندا بارلىعى 8 كوميۋنيتي ورتالىعى اشىلعان. ولار كۇندە، دەمالىس جۇمىس ىستەيدى. ورتالىقتارعا كۇن سايىن ورتا ەسەپپەن 300 ادام كەلەدى. 2025 جىلدىڭ سوڭىنا دەيىن وسىنداي 16 ورتالىق جۇمىس ىستەمەك.
بۇگىندە الماتىدا 14 پەن 35 جاس ارالىعىنداعى 680 مىڭعا جۋىق جاس تۇرادى، ونىڭ ىشىندە جەتىسۋ اۋدانىندا 58 مىڭنان استام جاس بار. NEET ساناتىنداعى جاستاردىڭ ۇلەسى (ءبىلىمى مەن جۇمىسى جوق جاستار) اۋداندا 6%. جالپى، مەگاپوليستە قۇرىلعان جاستاردى الەۋمەتتەندىرۋ جۇيەسىنىڭ ارقاسىندا NEET ساناتىنداعى جاستاردىڭ ۇلەسى ازايىپ كەلەدى.