حالىقتىڭ الەۋمەتتىك وسال توپتارى ساناتىنا جاتاتىن 218 كەزەكتە تۇرعاندار پاتەر كىلتتەرىن الدى.
بارلىعى ءۇش جاڭا ۇيدە 78 جەتىم بالا، I جانە II توپتاعى 31 مۇگەدەك، ۇوس جەڭىلدىكتەرى بويىنشا تەڭەستىرىلگەن 4 ارداگەر، مۇگەدەك بالالاردى تاربيەلەپ وتىرعان 23 وتباسى، 72 تولىق ەمەس وتباسى جانە 10 زەينەتكەر باسپانالى بولدى، دەپ حابارلايدى Almaty-akshamy.kz.
«بۇگىن قونىس تويىن 2011 جىلدان 2012 جىلعا دەيىن كەزەكتە تۇرعاندار اتاپ ءوتتى. كەلەسى اپتادا تۇرعىن ءۇيدىڭ جاڭا شارشى مەترىنە قونىستانۋدىڭ كەزەكتى كەزەڭى جوسپارلانۋدا»، - دەدى الماتى قالاسى كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى عالىمجان ءابدىشۇقىر ۇلى.
پاتەرلەردىڭ كىلتتەرىن الۋ ءۇشىن ادامدار وتباسىلارىمەن، بالالارىمەن جانە نەمەرەلەرىمەن كەلدى. ولاردىڭ اراسىندا ءبىر بولمەلى پاتەر العان كوپبالالى انا مايرا الىبايەۆا دا بار.
«مەن 75 جاستامىن، 11 بالانىڭ اناسىمىن. بۇرىن قالادا ۇلىمنىڭ وتباسىمەن بىرگە تۇردىم. ەندى مەن ءوز پاتەرىمدە ارباعا تاڭىلعان ۇلىممەن بىرگە تۇرامىن. قالا بيلىگىنە جاڭا شارشى مەتر ءۇشىن وتە ريزامىن»، - دەدى ول.
ەستەرىڭىزگە سالا كەتەيىك، ءحاوت ساناتىنداعى كەزەكتە تۇرعاندارعا كىلتتەردى تاپسىرۋ اعىمداعى جىلدىڭ 25 مامىرىندا باستالعان بولاتىن. سودان كەيىن ءۇش ۇيدە كەزەكتە تۇرعان 124 ادام پاتەر الدى. ەكىنشى اعىنمەن 28 مامىردا كەزەكتەگى 164 ادام قونىستاندى. 30 مامىردا تاعى 105 كەزەكتە تۇرعاندار كىلتتەرىن الدى. 5 ماۋسىمدا 111 وتباسى جاڭا ۇيلەرگە كوشتى. اعىمداعى جىلدىڭ 7 ماۋسىمىندا قونىس تويىن مەدەۋ سيتي تۇرعىن ءۇي كەشەنىندە 86 ادام اتاپ ءوتتى.
ايتا كەتەيىك، الماتى قالاسىنىڭ اكىمى ەربولات دوسايەۆتىڭ تاپسىرماسى بويىنشا 2024 جىلى قالانىڭ كوممۋنالدىق تۇرعىن ءۇي قورىنان حالىقتىڭ الەۋمەتتىك وسال توپتارىنىڭ ءتىزىمى بويىنشا كەزەكتە تۇرعان ازاماتتارعا كەزەكتىلىك تارتىبىمەن ەكى مىڭ جالعا بەرىلەتىن پاتەر بەرۋ جوسپارلانۋدا، ونىڭ ىشىندە 400 پاتەر جەتىم بالالارعا بەرىلەتىن بولادى.
