ماشينا جاساۋ – تەحنولوگيالىق ىلگەرىلەۋدىڭ دىڭگەگى. بۇل سالاداعى سۇرانىس تەك بۇگىن عانا ەمەس، بولاشاقتا دا ارتا تۇسپەك. الماتى تەلەكوممۋنيكاسيا جانە ماشينا جاساۋ كوللەدجىندە «2025 جىل - جۇمىسشى ماماندىقتار جىلىنا» وراي «ماشينا جاساۋ» سالاسى بويىنشا فورسايت-سەسسيا ءوتتى.
الماتى قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعى مەن تەحنيكالىق جانە كاسىپتىك ءبىلىم بەرۋ ءبولىمى قولداۋ كورسەتكەن ءىس-شاراعا ءبىلىم بەرۋ ۇيىمدارى مەن ءوندىرىس وكىلدەرى، الەۋمەتتىك سەرىكتەستەر مەن ب ا ق وكىلدەرى قاتىستى. ولاردىڭ قاتارىندا «كۋلاگەر مەتروستروي» ج ش س وكىلى زاكيرجان شامۋرادوۆ، «مەحەلەكترومونتاج» ءجشس-نىڭ ينجەنەر-مامانى ەرمەك تۇرسىن ۇلى، كوللەدج وقىتۋشىلارى مەن وندىرىستىك وقىتۋ شەبەرلەرى بولدى.
فورسايت-سەسسيانىڭ باستى ماقساتى – ماشينا جاساۋ تەحنولوگياسى، كەڭ بەيىندى ستانوكشى، توكارلىق ءىس جانە مەتالل وڭدەۋ باعىتتارىنداعى وزگەرىستەردى تالقىلاۋ، جاڭا قۇزىرەتتىلىكتەرگە ساي مامان دايىنداۋ ماسەلەلەرىن پىسىقتاۋ.
الماتى تەلەكوممۋنيكاسيا جانە ماشينا جاساۋ كوللەدجىنىڭ ديرەكتورى ارداق كودجاحمەتوۆا ءوز سوزىندە: «ءبىز ءارقاشان الەۋمەتتىك سەرىكتەستەرمەن بىرلەسە جۇمىس ىستەيمىز. قازىرگى تاڭدا ستۋدەنتتەردىڭ 60%-ى دۋالدى وقىتۋ جۇيەسى بويىنشا ءبىلىم الادى. بۇل – بولاشاق ماماننىڭ تاجىريبە جيناقتاپ، تابىس تابۋعا مۇمكىندىك الۋى دەگەن ءسوز. ءبىرقاتار تۇلەكتەر اي سايىن 300-مىڭ تەڭگەگە دەيىن جالاقى الادى»، – دەدى.
فورسايت-سەسسيادا «جاڭا ماماندىقتار مەن قۇزىرەتتىلىكتەر اتلاسى» نەگىزىندە ۇسىنىلعان جاڭا ماماندىقتار دا نازاردان تىس قالمادى. كوللەدجدىڭ وقۋ ءىسى جونىندەگى ورىنباسارى اقبوتا ماكەيەۆا:
– 2025 جىلدى مەملەكەت باسشىسى قاسىم-جومارت توقايەۆ «جۇمىسشىلار جىلى» دەپ جاريالاۋىنا بايلانىستى ءبىز بۇگىن جاڭا ماماندىقتار مەن قۇزىرەتتىلىكتەر اتلاسىنا سايكەس ماشينا جاساۋ سالاسى بويىنشا فورسايت-سەسسيا وتكىزىپ وتىرمىز.
فورسايت-سەسسيانىڭ باستى ماقساتى – قازىرگى زامانعى ەڭبەك نارىعىنا ساي، بولاشاقتا سۇرانىسقا يە بولاتىن جاڭا ماماندىقتاردى انىقتاپ، ولاردى ەنگىزۋ جولدارىن تالقىلاۋ. اتاپ ايتقاندا، ماشينا جاساۋ سالاسىنا قاتىستى ماماندىقتاردى اتلاستاعى قۇزىرەتتىلىكتەر نەگىزىندە بەيىمدەۋ جانە دامىتۋ. جاڭا ماماندىقتى ەنگىزۋ – كۇردەلى ءارى كەزەڭ-كەزەڭىمەن جۇزەگە اسىرىلاتىن پروسەسس. ول ءۇشىن الدىمەن تەحنيكالىق جانە كاسىپتىك، ورتا بىلىمنەن كەيىنگى ءبىلىمنىڭ ماماندىقتارى مەن بىلىكتىلىكتەرىنىڭ سىنىپتاۋىشىنا تولىقتىرۋلار ەنگىزىلىپ، وقۋ باعدارلاماسىن ازىرلەۋ قاجەت. الداعى ۋاقىتتا بۇل باعىتتا بىرلەسكەن جۇمىس جالعاسادى»، – دەپ اتاپ ءوتتى.
ماشينا جاساۋ – ءوندىرىستىڭ نەگىزى. بۇل سالاداعى مامانداردى زامان تالابىنا ساي دايارلاۋ – تەك كوللەدجدەردىڭ ەمەس، بۇكىل قوعامنىڭ جاۋاپكەرشىلىگى. ال فورسايت-سەسسيا – وسى باعىتتاعى ناقتى قادامداردىڭ ءبىرى. دەمەك، ەندىگى مىندەت – ۇسىنىستاردى جۇزەگە اسىرىپ، جۇمىس بەرۋشى مەن ءبىلىم بەرۋ ۇيىمىنىڭ بايلانىسىن نىعايتۋ بولماق.
ءىس-شارا سوڭىندا قاتىسۋشىلار كاسىبي پىكىرلەرىن ءبىلدىرىپ، ءوز ۇسىنىستارىمەن ءبولىستى.
ەرمەك يمامبەكوۆ، «مەحەلەكترومونتاج» ج ش س ينجەنەرى:
– قازىرگى تاڭدا توكار ماماندىعى اسا وزەكتى. جاڭا تەحنولوگيالار دامىپ جاتقانىمەن، توكارلىق ستانوكتارمەن جۇمىس ىستەي الاتىن ماماندار قاجەت. تەحنيكا 2–3 جىلدا بۇزىلۋى مۇمكىن، سوندىقتان ونى جوندەيتىن كادرلاردى الدىن الا دايىنداۋىمىز كەرەك.
ايتگۇل اليبايەۆا، الماتى اۆتومەحانيكالىق كوللەدجى ديرەكتورىنىڭ ءووىج ورىنباسارى:
– ءبىلىم بەرۋ بارىسىندا ءبىز AutoCAD، Fusion سياقتى قوسىمشالارمەن وقىتامىز. الايدا وندىرىستە ناقتى قانداي باعدارلامالار قولدانىلاتىنى ءارتۇرلى بولۋى مۇمكىن. سول سەبەپتى ءىت سالاسىندا جاڭا باعدارلامالار جاساۋ جانە ولاردى ماشينا جاساۋ سالاسىنا بەيىمدەۋ قاجەت دەپ سانايمىز.