حالىقارالىق ايەلدەر كۇنىنە وراي الماتىدا اۋقىمدى كونسەرت ءوتتى. ءبىر ساحنادا اتى اڭىزعا اينالعان جانە قازىرگى زامانعى ورىنداۋشىلار، سونداي-اق شەتەلدىك جۇلدىزدار ونەر كورسەتتى. مەرەكەلىك باعدارلاما اياسىندا تانىمال اندەر، كلاسسيكالىق شىعارمالار جانە ەرەكشە مۋزىكالىق كوللابوراسيالار ورىندالدى، دەپ حابارلايدى aqshamnews.kz
كونسەرتكە الماتى قالاسىنىڭ اكىمى ەربولات دوسايەۆ قاتىستى. قۇرمەتتى قوناقتاردىڭ قاتارىندا كوپبالالى انالار، ەڭبەك ارداگەرلەرى، عالىمدار، ۇستازدار، مادەنيەت، مەديسينا، سپورت جانە باسقا دا سالادا ەڭبەگى سىڭگەن جانە قىزمەت ەتەتىن ايەل ازاماتشالار بولدى.
كونسەرت ايگىلى «دوس-مۇقاسان» ءانسامبلى مەن «ALPHA» توبىنىڭ جاڭاشا ورىنداۋىنداعى
«16 قىز» انىمەن باستالدى. بۇل قويىلىم مۋزىكاداعى ۇرپاقتار ساباقتاستىعىنىڭ سيمۆولىنا اينالدى.
رومانتيكالىق كوڭىل-كۇيدى اراي مەن رۇستەم نۇرجىگىت جالعاستىرىپ، «گاۆان موەي ليۋبۆي» اتتى ليريكالىق كومپوزيسيانى ورىندادى. ودان كەيىن ساحناعا قازاقستاننىڭ حالىق ءارتيسى، بەلگىلى پيانيست ءجانيا اۋباكىروۆا شىعىپ، فرەدەريك شوپەننىڭ «ۆالس №7» شىعارماسىن ۇسىندى. كەيىن ول ەرلان كوكەيەۆپەن بىرگە «تانەس پود دوجدەم» كومپوزيسياسىن ورىندادى. كلاسسيكالىق اۋەن مەن اسەرلى ۆوكال ادەمى ۇيلەسىم تاۋىپ، كورەرمەندەرگە ەرەكشە اتموسفەرا سىيلادى.
كەيىن ساحنادا ماقپال يسابەكوۆا «ايالا مەنى» ءانىن، Kyle Ruh نازىكتىك پەن سيمۆوليزمگە تولى «اق قۇسىم» كومپوزيسياسىن ورىندادى.ال تولقىن زابيروۆا، 2RAR، سونداي-اق «ارناۋ» توبىنىڭ بۇرىنعى سوليستەرى نۇرجان كەرمەنبايەۆ پەن سالتانات باقايەۆا «ەگىز لەبىز» ءانىن ورىنداپ، كورەرمەندەردى اۋەزدىلىگىمەن جانە ەموسيالىق تەرەڭدىگىمەن باۋراپ الدى.
كەشتىڭ اسەرلى ساتتەرىنىڭ ءبىرى – Dinaya-نىڭ «ماما» ءانىن ورىنداۋى بولدى. بۇل ۋاقىتتا ەكراندا انالار مەن بالالاردىڭ بەينەكادرلارى كورسەتىلىپ، كورەرمەندەرگە ەرەكشە اسەر سىيلادى. Mona Songz «سەن» ءانىنىڭ جاڭا نۇسقاسىن ۇسىنىپ، ونى وزگەشە اۋەن مەن ەموسيالارعا بايىتتى. ودان كەيىن نۇرعالىم امانباي «سۇيەم مەن» كومپوزيسياسىمەن زالدى مەيىرىم مەن جىلۋلىققا بولەدى.
كوپشىلىكتىڭ سۇيىكتى توبى JCS «موي دوم» جانە «يا ليۋبليۋ تەبيا» اندەرىن ورىنداپ، فيلوسوفيالىق ءمانى بار تەرەڭ سەزىمدەردى جەتكىزدى. ال RaiM ەكى ءان ۇسىندى: جۇرەكتى ەلجىرەتكەن «جانىم-اۋ، سەن» جانە كوڭىلدى «ديسكوتەكا يز 90-ح».
كونسەرتتىڭ فينالدىق اككوردى – Made in KZ توبىنىڭ ورىنداۋىنداعى «انا تۋرالى جىر» كومپوزيسياسى بولدى. بۇل ءان كەشتىڭ جارقىن قورىتىندىسىنا اينالىپ، انالارعا دەگەن العىس پەن ماحابباتتى ءبىلدىردى.
كونسەرتكە ەرەكشە اتموسفەرا سىيلاعان تاعى ءبىر ەلەمەنت – ءتۇرلى كاسىپ وكىلدەرىنىڭ بەينەقۇتتىقتاۋلارى. پوليسەيلەر، اسكەري قىزمەتكەرلەر، ءورت سوندىرۋشىلەر، قۇرىلىسشىلار مەن سپورتشىلار ايەلدەرگە دەگەن العىسىن ءبىلدىرىپ، جىلى لەبىزىن جەتكىزدى.
بۇل ءىس-شارا مۋزىكالىق كەش عانا ەمەس، سونىمەن قاتار الماتىنىڭ دامۋىنا ەڭبەگى سىڭگەن ايەلدەرگە دەگەن قۇرمەت بەلگىسى بولدى.