Freedom Ticketon پلاتفورماسىنداعى بيلەتتەر ساتىلىمى 2024 جىلى ەكى ەسەگە جۋىق ءوستى. بۇل تۋرالى الماتىدا وتكەن باسپا ءسوز شاراسىندا Freedom Ticketon ونلاين بيلەتتەرىن ساتۋ قىزمەتىنىڭ باس ديرەكتورى ۆيكتوريا تورگۋناكوۆا مالىمدەدى.
سپيكەر قازاقستانداعى ويىن-ساۋىق نارىعىنا شولۋ جاسادى. وتكەن جىلى قازاقستاندىقتار بارلىق ءىس-شاراعا ايىنا شامامەن 11 801 تەڭگە جۇمساعان. ولاردىڭ ويىن-ساۋىققا، مادەنيەت پەن ونەرگە جۇمساعان جالپى شىعىنى كومپانيانىڭ مالىمەتى بويىنشا 2024 جىلى 73 ملرد تەڭگەنى قۇرادى. بۇل ءبىر جىل بۇرىنعىدان 16،1 ملرد تەڭگەگە جانە كومپانيا ءبىر جىل بۇرىن بولجاعان كورسەتكىشتەن 3،8 ملرد تەڭگەگە ارتىق.
بيلەتتەردى ساتىپ الۋ پلاتفورماسىن ەڭ بەلسەندى پايدالانۋشىلارى استانا (50،6%)، الماتى (48،1%) جانە قاراعاندى (33%) قالالارىندا. ترانزاكسيالار سانى بويىنشا جانر كوشباسشىسى بولىپ كينو (831 مىڭ)، ودان كەيىن كونسەرتتەر (700 مىڭ) جانە تەاترلاندىرىلعان قويىلىمدار (500 مىڭ) تۇر. كينوعا ەڭ جوعارى قىزىعۋشىلىقتى پاۆلودار (68،3%) جانە شىمكەنت (64،1%) قالالارىنىڭ تۇرعىندارى كورسەتتى، ال سپورتتىق ءىس-شارالارعا قىزىعۋشىلار اقتوبەدە (57،9%) كوپ.
Freedom Ticketon مالىمەتتەرى بويىنشا، 2024 جىلى كينوپروكات ويىن-ساۋىق نارىعىندا جەتەكشىلىك ەتۋدى جالعاستىرىپ، جالپى كىرىستىڭ 65،4% قۇراعان. ودان كەيىن گاسترولدىك ءىس-شارالار (23،9%)، تەاتر قويىلىمدارى (4،08%) جانە سپورتتىق ءىس-شارالار (2،05%) جارلعاستىرادى. 2023 جىلمەن سالىستىرعاندا سپورتتىق ءىس-شارالاردىڭ ۇلەسى كينونىڭ پايداسىنا 4%-دان ەكى ەسەگە دەرلىك قىسقارىپتى. دەگەنمەن، وتكىزىلگەن ءىس-شارالاردىڭ 102% رەكوردتىق ءوسىمىن كورسەتكەن سپورتتىق ءىس-شارالار بولدى. گاسترولدىك سپەكتاكلدەر دە 49%-عا ءوستى. سونىمەن قاتار، كونسەرتتىك سەگمەنت ازداپ تومەندەگەن – وتكەن جىلمەن سالىستىرعاندا 2% از (2023 جىلى 3155 بولسا، وتكەن جىلى 3115). كونسەرتتەردىڭ ساپاسى ارتقانىن دا ايتا كەتكەن ءجون: شارالار اۋقىمى مەن شاقىرىلعان ارتىستەردىڭ مارتەبەسى ارتتى.
وتاندىق كينو ءوز پوزيسياسىن نىعايتتى: پروكاتتاعى قازاقستاندىق فيلمدەردىڭ سانى 2023 جىلعى 72-دەن 2024 جىلى 103-كە دەيىن ءوسىپ، نارىقتىڭ 20%-ىن يەلەندى. شەتەلدىك فيلمدەردىڭ باسىمدىعىنا (80%) قاراماستان، قازاقستاندىق كينو بارلىق كاسسالىق كىرىستەردىڭ ۇشتەن بىرىنەن استامىن، 18،4 ملرد تەڭگە جيناعان بولسا، شەتەلدىك فيلمدەردەن 29،2 ملرد تەڭگە تۇسكەن. جالپى كىرىستە شەتەلدىك فيلمدەردىڭ ۇلەسى 61%، وتاندىق فيلمدەردىڭ ۇلەسى 39% بولدى. جىلدىڭ ەڭ كوپ تابىس اكەلگەن ءفيلمى «موانا 2» (1،85 ميلليارد تەڭگە)، ەكىنشى ورىندا قازاقستاندىق «ءداستۇر» ءفيلمى (1،72 ميلليارد تەڭگە)، ءۇشىنشى ورىندى «ۆەنوم: سوڭعى بي» (1،70 ميلليارد تەڭگە) الدى.
ۆيكتوريا سونىمەن قاتار بيىلعى جىل سايىنعى Freedom Ticketon ماراپاتتارىنا اسەر ەتكەن وزگەرىستەر تۋرالى ايتتى. «جىلدىڭ شەتەلدىك ءفيلمى»، «جىل ءمۋلتفيلمى»، «جىلدىڭ گاسترولدىك وقيعاسى»، «جىل بلوگەرى»، «جىل سپورتشىسى» ماراپاتتارى الىنىپ تاستالدى. ساراپشى ماراپات ەندى ونى باعالايتىندارعا جانە سالتاناتتى راسىمگە قاتىسۋعا دايىن ادامدارعا باعىتتالعانىن اتاپ ءوتتى. «جىل كورمەسى»، «جىل مۇراجايى»، «جىل ونەر نىسانى» دەگەن ءۇش بولىمنەن تۇراتىن جاڭا ART نوميناسياسى بەكىتىلدى.
جەڭىمپازدار ءساۋىر ايىندا الماتىدا وتەتىن سالتاناتتى ماراپاتتاۋ راسىمىندە جاريالانادى.