الماتىنىڭ مەدەۋ اۋدانىندا 69 جىل بويى جوندەۋدى كورمەگەن №10 جەدەل جاردەم قوسالقى ستانسياسىنا ارنالعان جاڭا عيمارات بوي كوتەرەدى. بۇل تۋرالى الماتى قالاسىنىڭ اكىمى ەربولات دوسايەۆ اۋدان تۇرعىندارىمەن كەزدەسۋدە مالىمدەدى، دەپ حابارلايدى aqshamnews.kz
ونىڭ ايتۋىنشا، ەسكى عيمارات 1955 جىلى سالىنعان جانە جاڭا عيمارات سالۋ ءۇشىن ءۇش جەر ۋچاسكەسىن ساتىپ الۋ جوسپارلانعان.
قالا باسشىسى بيىلعى جىلدىڭ ماۋسىم ايىندا №4 جەدەل جاردەم ستانسياسىن جاڭعىرتۋ باستالعانىن، جۇمىستار 2025 جىلدىڭ ءساۋىر ايىندا اياقتالاتىنىن ايتتى.
سونداي-اق، ونىڭ ايتۋىنشا، بيىل №2 قالالىق مامانداندىرىلعان بالالار ءۇيىن كۇردەلى جوندەۋ باستالدى. جۇمىستى 2024 جىلدىڭ سوڭىنا دەيىن اياقتاۋ جوسپاردا بار.
حالىقپەن ەسەپتىك كەزدەسۋ بارىسىندا ەربولات دوسايەۆ بيىل مەدەۋ اۋدانىندا مەديسينالىق قىزمەت كورسەتۋ ساپاسىن جاقسارتۋ ءۇشىن بىردەن ءۇش اۋقىمدى دەنساۋلىق ساقتاۋ نىسانى بويىنشا جوبالىق-سمەتالىق قۇجاتتاما ازىرلەنىپ جاتقانىن اتاپ ءوتتى. بۇل "دۋمان" شاعىناۋدانىندا اۋىسىمدا 500 ادام قابىلدايتىن جاڭا ەمحانا سالۋ، "الاتاۋ" قالالىق اۋرۋحاناسى مەن №2 ەمحانانىڭ عيماراتتارىن قايتا جاڭارتۋ جوسپاردا بار.
مەدەۋ اۋدانىندا بارلىعى 5 ەمحانا امبۋلاتوريالىق كومەك كورسەتەدى، ولارعا جوسپار بويىنشا 2 470 پاسيەنت كەلۋى ءتيىس، الايدا ناقتى سانى 3 مىڭنان استام ادامدى قۇرايدى. دەنساۋلىق ساقتاۋ وبەكتىلەرىن سالۋ جانە رەكونسترۋكسيالاۋ بويىنشا قابىلدانىپ جاتقان شارالار جۇكتەمەنى ايتارلىقتاي تومەندەتۋگە جانە مەديسينالىق قىزمەت كورسەتۋ ساپاسىن جاقسارتۋعا مۇمكىندىك بەرەدى.