بۋتاكوۆكا مەن تەررەنكۋر: ەربولات دوسايەۆتىڭ تاپسىرماسىمەن مەدەۋ اۋدانىنداعى الماتىلىقتاردىڭ سۇيىكتى دەمالىس ورىندارى اباتتاندىرىلادى
الماتىنىڭ مەدەۋ اۋدانىندا جايلى قالالىق ورتا قۇرۋ جۇمىستارى جالعاسۋدا. بۇل تۋرالى قالا اكىمى ەربولات دوسايەۆ وسى اۋدان تۇرعىندارىمەن كەزدەسۋدە حابارلادى.
قوعامدىق كەڭىستىكتەردى دامىتۋ اياسىندا «تەررەنكۋر» اۋماعىن جاڭعىرتۋ جۇمىستارى جۇرگىزىلۋدە، وندا 20 جىلدان استام ۋاقىت جوندەۋ جۇمىستارى جۇرگىزىلمەگەن. توعان اباتتاندىرىلىپ، بالالار الاڭدارى، دەمالىس ايماقتارى، يوگا جانە سپورتپەن اينالىسۋعا ارنالعان ورىندار جاسالادى. قۇرىلىس-مونتاج جۇمىستارى بيىل قاراشا ايىندا اياقتالادى دەپ جوسپارلانعان.
سونىمەن قاتار، قالا باسشىسى «بۋتاكوۆكا» وزەنىنىڭ ارناسىن قايتا قۇرۋ جانە سۋ قورعاۋ بەلدەۋىن اباتتاندىرۋعا ارنالعان جوبالىق-سمەتالىق قۇجاتتاما (جسق) ازىرلەنىپ جاتقانىن اتاپ ءوتتى. جوبا ارنانى قايتا قۇرۋ جانە نىعايتۋ، جاياۋ جۇرگىنشىلەر جولىن، دەمالىس ايماعىن، جارىقتاندىرۋدى جانە مىڭنان استام اعاش پەن بۇتا وتىرعىزۋدى قامتيدى. جسق ازىرلەۋ جانە ساراپتامادان وتكىزۋ وسى جىلدىڭ سوڭىنا دەيىن اياقتالادى.
اعىمداعى جوندەۋ جۇمىستارى اياسىندا الماتىدا اۋلا اۋماقتارىن اباتتاندىرۋ بويىنشا 838 ملن تەڭگەگە 13 جوبا جانە ساياباقتار مەن سكۆەرلەردى اباتتاندىرۋ بويىنشا 4 جوبا جۇزەگە اسىرىلۋدا. بارلىق جۇمىس قازان ايىندا اياقتالادى.
سونىمەن قاتار، «حالىق قاتىساتىن بيۋدجەت» باعدارلاماسى اياسىندا 34 جوبانى ىسكە اسىرۋعا 2 ملرد تەڭگە ءبولىندى. قازىرگى تاڭدا 3 اۋلا اۋماعىن اباتتاندىرۋ، 5 اۆتوماتتى سۋارۋ جۇيەسىن ورناتۋ جۇمىستارى اياقتالدى. بيىل قازان ايىنىڭ سوڭىنا دەيىن 17 اۋلا اۋماعىن اباتتاندىرۋ، 2 اۆتوماتتى سۋارۋ جۇيەسىن ورناتۋ، سونداي-اق 7 سكۆەر مەن سپورت الاڭىندا جۇمىستاردى اياقتاۋ جوسپارلانىپ وتىر.
