الماتىدا جەدەل رەسپيراتورلىق ۆيرۋستىق ينفەكسيالار (جرۆي) مەن گونگكونگ تۇماۋ ءورشىپ تۇر. 32 456 ناۋقاس جرۆي جۇقتىرعان. ال گونگكونگ تۇماۋى بويىنشا قالاداعى ەپيداحۋال قانداي؟ اqshamnews.kz انىقتاپ كوردى.
اۋرۋحاناعا جاتقىزىلعاندار سانى قانشا؟
دارىگەرلەردىڭ ايتۋىنشا، جرۆي جۇقتىرعان 415 ادام اۋرۋحاناعا جاتقىزىلعان، ولاردىڭ ىشىندە 49 جۇكتى ايەل جانە 1 جاسقا دەيىنگى 61 ءسابي بار. پنيەۆمونيا دياگنوزىمەن 71 ادام ستاسيونارعا تۇسكەن، ونىڭ 12ء-سى - 14 جاسقا دەيىنگى بالالار، بىرەۋى - ءبىر جاسقا دا تولماعان.
جاڭا ەپيدماۋسىم باستالعاننان بەرگى كورسەتكىشتەر قانداي؟
جاڭا ەپيدماۋسىم باستالعالى (قازان مەن قاراشا ارالىعى - ەسك.) قالادا 173 428 ناۋقاس جرۆي جۇقتىرعان. بۇل بىلتىرعى كورسەتكىشتەن 16،8 پايىزعا جوعارى.
قاراشادان باستاپ 3340 ادام جرۆي-مەن اۋرۋحاناعا جاتقىزىلعان:
- ونىڭ ىشىندە 363 جۇكتى ايەل؛
- 464 ءبىر جاسقا دەيىنگى بالا بار.
پنيەۆمونيادان 591 ناۋقاس ەمدەلىپ جاتىر، ولاردىڭ قاتارىندا جۇكتى ايەلدەر دە (4 ادام)، 14 جاسقا دەيىنگى بالالار دا (108 جاعداي، سونىڭ 26-سى - ەمىزۋلى سابيلەر) بار.
مەكتەپتەگى احۋال قانداي؟
دارىگەرلەردىڭ ايتۋىنشا، مەكتەپتەردەگى جاعداي ازىرگە باقىلاۋدا. قازاننان باستاپ الماتىداعى 178 مەكتەپتە 1930 جرۆي جاعدايى تىركەلگەن.
"مەكتەپتەردە تاڭەرتەڭگى جانە اۋىسىمدىق سۇزگى جۇرگىزىلىپ، جرۆي مەن تۇماۋدىڭ بەلگىلەرى بار بالالار مەن قىزمەتكەرلەر انىقتالىپ، ۇيىنە جىبەرىلىپ وتىرادى"، - دەدى الماتى دەنساۋلىق ساقتاۋ باسقارماسى وكىلدەرى.
قانداي ۆيرۋستار اينالىمدا ءجۇر؟
ۆيرۋستاردىڭ قۇرامى دا ادەتتەگى ماۋسىمدىق كورىنىستى كورسەتىپ تۇر. قاراشادان بەرى قالادا:
- A/H3N2 ءتيپتى گونگكونگ تۇماۋ،
- رينوۆيرۋس،
- پاراگريپپ،
- ادەنوۆيرۋس،
- ماۋسىمدىق كوروناۆيرۋس قاتار اينالىمدا ءجۇر.
گونگكونگ تۇماۋىنا قاتىستى احۋال قانداي؟
ەپيدوسۋ كەزەڭىندە A/H3N2 گونگكونگ تۇماۋىن 69 ادام جۇقتىرعان. بۇل زەرتحانادا راستالعان، ولاردىڭ بارلىعى تۇماۋعا قارسى ەكپە الماعاندار.
ۆەدومستۆو مالىمەتىنشە، ۆيرۋستى نەگىزىنەن جۇكتى ايەلدەر (25 جاعداي)، جۇمىس ىستەيتىن جانە ىستەمەيتىن ەرەسەكتەر، زەينەتكەرلەر، ستۋدەنتتەر، مەكتەپ وقۋشىلارى مەن بالاباقشاداعى بالالار جۇقتىرعان.
بارلىق ناۋقاس ەم قابىلداپ جاتىر، دارىگەرلەر ولاردىڭ جاعدايىن قاناعاتتانارلىق دەپ باعالادى.
ددسۇ گونگكونگ تۇماۋىنا قاتىستى قانداي بولجام ايتادى؟
دۇنيەجۇزىلىك دەنساۋلىق ساقتاۋ ۇيىمى سولتۇستىك جارتىشاردا الداعى كۇز-قىس ماۋسىمىندا ا/H1N1/pdm09 جانە ا/H3N2 تۇماۋ ۆيرۋستارى، سونداي-اق ۆ ءتيپتى ۆيرۋس قاتار اينالىمدا بولادى دەپ بولجايدى. سونىڭ ىشىندە ا/H3N2 شتاممىنىڭ باسىم بولۋى جانە العاشقى اپتالارىنان-اق ءورشۋى مۇمكىن ەكەنى ايتىلعان.
ەپيدماۋسىم باستالار الدىندا الماتىدا 254 115 ادام تۇماۋعا قارسى ۆاكسينا العان.
دارىگەرلەر ازىرگە دۇرلىگۋدىڭ قاجەتى جوعىن، ءبىراق دەنساۋلىققا ەرەكشە نازار اۋدارۋدى ۇسىنادى. ۋاقتىلى ۆاكسيناسيا، ءۇي-جايدى ءجيى جەلدەتۋ، كوپشىلىك ورىنداردا ماسكا تاعۋ، قول جۋۋ، اۋىرىپ قالعاندا جۇمىسقا، مەكتەپكە بارماي، دارىگەر شاقىرۋ كەرەگىن ەسكەرتەدى.