الماتىدا 69 ادام گونگكونگ تۇماۋىن جۇقتىرعان. الماتى دەنساۋلىق ساقتاۋ باسقارماسى مەكتەپتەر قاشىقتان وقىتىلا ما دەگەن سۇراققا جاۋاپ بەردى، - دەپ حابارلايدى aqshamnews.kz ءتىلشىسى.
بۇل تۋرالى الماتى قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا مالىمدەدى.
ونىڭ ايتۋىنشا، ءقازىر قالاداعى ەشبىر مەكتەپتە وقۋشىلار اراسىنداعى سىرقاتتانۋ كورسەتكىشى بەلگىلەنگەن شەكتى دەڭگەيدەن اسپاعان.
"بۇگىنگى جاعداي بويىنشا، جرۆي-گە قاتىستى وقۋشىلار اراسىندا سىرقاتتانۋ كورسەتكىشى بەلگىلەنگەن شەكتى دەڭگەيدەن اسقان جوق. باس مەملەكەتتىك سانيتاريالىق دارىگەردىڭ قاۋلىسىنا سايكەس، ونلاين وقۋعا كوشۋ تەك جەكە سىنىپتار بويىنشا قاراستىرىلادى، بۇكىل مەكتەپ بويىنشا ەمەس"، – دەدى مامان.
ونىڭ سوزىنشە، ونلاين فورماتقا اۋىسۋ ءۇشىن جرۆي نەمەسە تۇماۋ جۇقتىرعان وقۋشىلار سانى 30 پايىزدان اسۋى كەرەك. قازىرگى الماتىداعى ەشبىر مەكتەپتە مۇنداي جاعداي تىركەلمەگەن.
"بالاباقشالار بويىنشا دا جاعداي باقىلاۋدا. الماتى قالاسى بويىنشا ۋاقىتشا جابىلعان بىردە-بىر بالاباقشا جوق"، – دەپ جەتكىزدى سپيكەر.
ول قالاداعى ەپيدەميولوگيالىق جاعداي مونيتورينگتىڭ تۇراقتى جۇرگىزىلىپ وتىرعانىن، بارلىق ءبىلىم بەرۋ ۇيىمدارىندا تاڭەرتەڭگى سۇزگى مەن پروفيلاكتيكالىق شارالار جالعاسىپ جاتقانىن اتاپ ءوتتى.
ەسكە سالايىق، الماتىدا 69 ادام گونگكونگ تۇماۋىن جۇقتىرعان.