جەتىسۋ وبلىسىنىڭ پروكۋراتۋراسى جەكە سوت ورىنداۋشىلارىنىڭ تابىسىن جاسىرۋ دەرەكتەرىن انىقتادى، - دەپ حابارلايدى aqshamnews.kz ءتىلشىسى تالدىقورعان پروكۋراتۋراسىنا سىلتەمە جاساپ.
تەكسەرۋ بارىسىندا ءبىرقاتار جەكە سوت ورىنداۋشىلارىنىڭ (جسو) 2023 جىلعا ارنالعان 240.00 نىساندى جەكە تابىس سالىعى دەكلاراسياسىندا ناقتى تاپقان كىرىستەرىن ەداۋىر تومەندەتىپ كورسەتكەنى بەلگىلى بولدى.
پروكۋراتۋرا بۇل "كولەڭكەلى" تاجىريبە سالىق زاڭناماسىن عانا ەمەس، ادال سالىق تولەۋشىلەرگە قاتىستى ادىلدىك قاعيداتتارىن دا بۇزاتىنىن اتاپ ءوتتى.
رەسمي ستاتيستيكاعا سايكەس، اياقتالعان اتقارۋشىلىق وندىرىستەردىڭ ناقتى كولەمى 896،1 ملن تەڭگە بولعان. الايدا سالىق دەكلاراسيالارىندا بار بولعانى 231 ملن تەڭگە عانا كورسەتىلگەن. ياعني جاسىرىلعان ايىرماشىلىق 665،1 ملن تەڭگەگە جەتكەن.
قالا پروكۋراتۋراسىنىڭ ۇسىنۋى ناتيجەسىندە ءۇش جەكە سوت ورىنداۋشىسى قوسىمشا سالىق دەكلاراسيالارىن تاپسىرىپ، سونىڭ نەگىزىندە 2،6 ملن تەڭگە كولەمىندە قوسىمشا سالىق تولەگەن.
وسىنداي ۇقساس بۇزۋشىلىقتار بارلىعى 17 جەكە سوت ورىنداۋشىدان انىقتالدى. ءقازىر پروكۋرورلىق قاداعالاۋ اكتىسىن ورىنداۋ ماقساتىندا ۋاكىلەتتى ورگان جسو-لاردىڭ سالىق بەرەشەگىن ءوندىرۋ بويىنشا شارالار قابىلداپ جاتىر.