الماتىدا 61 جاستاعى ەسىرتكى ساتۋشىسى ۇستالدى
ەسىرتكى ساتۋشى ەسىرتكىنى كوتەرمە جانە بولشەك ساۋدادا ساتۋمەن اينالىسقان 61 جاستاعى گ.ەسىمدى ازامات بولىپ شىقتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«كۇدىكتىنى ۇستاۋ بويىنشا ارنايى ءىس-شارانى جۇرگىزبەس بۇرىن، ءبىزدىڭ بولىمشەنىڭ قىزمەتكەرلەرى جەدەل جانە ارنايى شارالار كەشەنىن جۇزەگە اسىردى. دالەلدەر مەن ايعاقتار جەتكىلىكتى كولەمدە جيناقتالدى. كۇدىكتى كۇندىزگى ۋاقىتتا گاراج كووپەراتيۆتەرىنىڭ ءبىرىنىڭ اۋماعىندا ۇستالدى. ءبىزدىڭ مالىمەت بويىنشا، كۇدىكتى ساتۋعا دايىندالعان قىلمىستىق زاتتى سول جەردە ساقتاعان. ءتىنتۋ كەزىندە گاشيش سالىنعان 13 بۋما، ماريحۋانا سالىنعان 13 بۋما، پم-9مم تاپانشاسىنىڭ ءبىر پاترونى، 740 مىڭ تەڭگە كولەمىندە قولما-قول اقشا، 1 150 دوللار، 50 ەۋرو تابىلىپ، تاركىلەندى. تاركىلەنگەن زات سوت-حيميالىق ساراپتاماعا جىبەرىلدى»، — دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
پوليسيا شاھارعا ءشوپتى جەتكىزۋ ارناسىن، سونداي-اق ەسىرتكى ساتۋشىنىڭ تۇراقتى تۇتىنۋشىلارىنىڭ شەڭبەرىن انىقتايدى. ال گ.ەسىمدى ازامات ۋۇي-عا قامالدى.