بۇگىن، 10 تامىز كۇنى الماتىدا قازاقتىڭ باس اقىنى، ويشىل جانە اعارتۋشى اباي قۇنانباي ۇلىنىڭ تۋعانىنا 180 جىل تولۋىنا ارنالعان سالتاناتتى ءراسىم ءوتتى. اباي الاڭىنداعى ءىس-شارا مەرەكەلىك باعدارلامانىڭ باستى وقيعاسىنا اينالىپ، 5000-نان استام قاتىسۋشىنى جينادى، دەپ حابارلايدى Aqshamnews.kz.
سالتاناتتى جيىنعا قالا اكىمى دارحان ساتىبالدى، ءماسليحات دەپۋتاتتارى، قوعامدىق كەڭەس مۇشەلەرى، زيالى قاۋىم وكىلدەرى، شىعارماشىلىق جانە مادەني ۇيىمدار مەن جاستار قاتىستى. قاتىسۋشىلار ۇلى ويشىلدىڭ ەسكەرتكىشىنە گۇل شوقتارىن قويىپ، رۋحىنا تاعزىم ەتتى. مونۋمەنت تۇبىنە جۇزدەگەن راۋشان گۇلدەرى قويىلدى.
قالا تۇرعىندارى مەن قوناقتارى «جەلسىز تۇندە جارىق اي» جانە «كوزىمنىڭ قاراسى» اتتى ابايدىڭ اڭىزعا اينالعان شىعارمالارىن «وتىرار سازى» وركەسترىنىڭ، بايقاداموۆ اتىنداعى مەملەكەتتىك حور كاپەللاسىنىڭ جانە قۇرمانعازى اتىنداعى قازاق ۇلتتىق كونسەرۆاتورياسى ستۋدەنتتەر حورىنىڭ سۇيەمەلدەۋىمەن ورىندادى.
ايتا كەتەيىك، الماتىدا ابايدىڭ مەرەيتويىنا وراي 100-دەن استام ءىس-شارا ۇيىمداستىرىلادى: تەاتر قويىلىمدارى، پوەزيا كەشتەرى، ادەبي ساعاتتار، كورمەلەر، كونسەرتتەر، جاستارمەن كەزدەسۋلەر، سونداي-اق،سپورتتىق، قايىرىمدىلىق جانە اعارتۋشىلىق اكسيالار قالانىڭ بارلىق اۋدانىندا وتەدى.