سولتۇستىك قازاقستان وبلىسىندا ءتورت ادام دونەردەن ۋلانىپ قالدى، دەپ حابارلايدى Aqshamnews.kz ءتىلشىسى.
وقيعا ماعجان جۇمابايەۆ اۋدانىنداعى بۋلايەۆو قالاسىندا ءوتىپ جاتقان “جاستار-2025” وبلىستىق سپارتاكياداسى كەزىندە بولدى. وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە، زارداپ شەككەندەردىڭ ۇشەۋى – بالا، بىرەۋى – ەرەسەك. الدىن الا دەرەك بويىنشا، ولاردىڭ بارلىعى 8 تامىزدا اۋىلدىق ستاديون اۋماعىنداعى ساۋدا نۇكتەسىنەن دونەر جەگەن.
ماعجان جۇمابايەۆ اۋداندىق سانيتاريالىق-ەپيدەميولوگيالىق باقىلاۋ باسقارماسى ەپيدەميولوگيالىق تەكسەرىس باستاپ، بارلىق قاجەتتى سىنامالار الىندى.
وبلىستىق دەنساۋلىق ساقتاۋ باسقارماسىنىڭ حابارلاۋىنشا، ۋلانعانداردىڭ بارلىعى پەتروپاۆلداعى ينفەكسيالىق اۋرۋحاناعا جاتقىزىلعان.
“بارلىق ناۋقاستىڭ جاعدايى تۇراقتى، ورتاشا اۋىرلىقتا، وڭ ديناميكا بايقالادى”، – دەلىنگەن ۆەدومستۆو حابارلاماسىندا.
ايتا كەتەيىك، بۇعان دەيىن پاۆلوداردا قىز ۇزاتۋ كەزىندە جاپپاي ۋلانۋ دەرەگى تىركەلگەن بولاتىن. سول كەزدە مەيرامحانا يەسى سانيتاريالىق تالاپتاردى بۇزىپ، رۇقساتسىز جۇمىس ىستەگەنى انىقتالعان.